17 верасня на Кальварыі ў парафіі Маці Божай Шкаплернай у Мядзелі адбылася адпустовая ўрачыстасць Узвышэння Святога Крыжа. Урачыстасць узначаліў дапаможны біскуп Мінска-Магілёўскай архідыяцэзіі Аляксандр Яшэўскі SDB.

У парафіяльнай святыні іерарха прывітаў пробашч парафіі а. Павел Леліто OCD. Затым малітоўная працэсія вырушыла на Кальварыю. Працэсія суправаджалася ружанцовай малітвай і спевамі, якія ўзначаліў моладзевы парафіяльны хор. Ля брамаў Кальварыі біскупа прывітала моладзь парафіі, запрасіўшы разам прайсці Крыжовы шлях Езуса Хрыста.

Разважанні стацый былі прысвечаны ўчынкам міласэрнасці для душы і цела. Падчас Крыжовага шляху біскуп благаславіў новыя крыжы на капліцах.

Пасля заканчэння набажэнства Крыжовага шляху пры апошняй стацыі на гары Крыжоў адбылася святая Імша, падчас якой іерарх удзяліў вернікам парафіі сакрамэнт канфірмацыі.

У гаміліі біскуп нагадаў пра асаблівую важнасць знаку крыжа ў штодзённым жыцці і дзейнасці, а таксама пажадаў, каб крыж і дары Духа Святога былі інтэгральнай часткай духоўнага і фізічнага жыцця кожнага чалавека. На заканчэнне літургіі іерарх удзяліў прысутным пастырскае благаслаўленне.

А. Юрый Кулай OCD

(AG)