13 лістапада на могілках у Тарасаве пад Мінскам прайшла цырымонія ўскладання вянкоў і кветак на магілу ахвяраў Першай сусветнай вайны, дзе знайшлі свой спачын больш за тысяча ваеннапалонных з Германіі, Румыніі, Чэхіі, Аўстрыі, Польшчы, Югаславіі, Венгрыі, Францыі і Балгарыі.

Гэты дзень, зацверджаны ў 1919 годзе, лічыцца ў Германіі днём народнага смутку, служачы напамінам пра неабходнасць прымірэння.

У памятнай цырымоніі прынялі ўдзел паслы і прадстаўнікі дыпламатычных місій Германіі, Польшчы, Балгарыі, Расіі, Румыніі і іншых краін. Узначаліў цырымонію пасол Германіі ў Беларусі Пэтэр Датмар, які выступіў перад прысутнымі з адмысловым словам:

«Мы павінны зрабіць усё магчымае, каб падобнае не паўтарылася, — сказаў пасол. — Дзень народнага смутку — гэта не толькі дзень мёртвых, але і дзень жывых. Такія месцы, як гэта, нясуць у сабе канкрэтнае пасланне ўсяму свету — спрыяць захаванню міра».

«Важна, каб такія паняцці як “мір” і “свабода” былі не проста прыгожымі словамі, але заставаліся нашымі каштоўнасцямі», — падкрэсліў Петэр Датмар.

Таксама на цырымоніі прысутнічаў Апостальскі Нунцый у Беларусі арцыбіскуп Габар Пінтэр.

«Гісторыя вучыць нас не адмаўляцца ад нашай адказнасці, — сказаў прадстаўнік Папы. — Каб сказаць адзін аднаму “брат”, трэба падняць вочы да неба і прызнаць, што ўсе мы з’яўляемся Божымі дзецьмі».

У памяць аб ахвярах войнаў іерарх зачытаў малітву на беларускай мове, пасля чаго супольна з прысутнымі памаліўся «Ойча наш».

Мерапрыемства прайшло пры падтрымцы беларускага прадстаўніцтва Народнага саюза Германіі па доглядзе ваенных пахаванняў.

Ілья Лапато, фота аўтара