Фармацыйная сустрэча святароў праходзіла з 14 па 17 лістапада ў Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску.

У ёй прынялі ўдзел святары, якія атрымалі прэзбітэрскае пасвячэнне менш за пяць гадоў таму і належаць да духавества Мінска-Магілёўскай архідыяцэзіі і Пінскай дыяцэзіі.

Ксёндз прэлат Андрэй Стэцкевіч, біскупскі вікарый па справах духавенства Мінска-Магілёўскай архідыяцэзіі, прамаўляў да маладых святароў на тэму духоўных аспектаў святарскага служэння. Ксёндз Дзмітрый Пухальскі, канцлер Мінска-Магілёўскай архідыяцэзіі, на працягу трох дзён выступаў з серыямі дакладаў на тэмы кананічных і душпастырскіх нюансаў, з якімі сутыкаюцца святары, калі да іх звяртаюцца вернікі з просьбай аб удзяленні сакрамэнту хросту і благаслаўленні сужэнства.

У перадапошні дзень сустрэчы святары наведалі крыпту пінскай катэдры, у якой пахаваны кардынал Казімір Свёнтэк, і магілы святароў на пінскіх могілках.

Кс. Кірыл Бардонаў, фота аўтара