8 студзеня, як і кожны год у калядны час, у парафію Святога Антонія ў Мар’інай Горцы завітаў святы Мікалай, каб прынесці калядны настрой і падарункі, а таксама нагадаць, як важна дзяліцца радасцю адно з адным.

На святы Божага Нараджэння кожны рыхтуе падарункі. Зрабілі гэта і дзеці мясцовай парафіі. Малым акцёрам з парафіяльнага гуртка «Пухавіцкія пярлінкі» выпаў гонар падрыхтавать падарунак самаму лепшаму сябру — Езусу Хрысту. У сваёй каляднай аповесці дзеці казалі святому Мікалаю, што прагнуць напоўніць свае сэрцы любоўю і дабрынёю, каб падарыць іх Езусу.

Былі ў гэтае свята таксама карагод, вясёлыя танцы і калядныя спевы. А святы Мікалай, як заўсёды, прыйшоў не з пустымі рукамі. Галоўным яго падарункам быў тэлевізар для парафіяльнага катэхетычнага класа.

Была таксама магчымасць атрымаць асабіста гасцінец, але для гэтага трэба было вытрымаць іспыт ад святога Мікалая: адказаць на пытанні, расказаць верш ці выканаць калядную песню. Усе прысутныя дзеці выдатна з гэтым справіліся.

Святы Мікалай пасля ўрачыстасці прызнаўся дзецям, што яны сваім выступленнем, сваім імкненнем любіць Езуса, сваёю вераю ў прыгажосць і дабрыню, вельмі яго парадавалі. Святы Мікалай пакідаў гэтую парафію з верай і надзеяй, што мясцовыя дзеці захаваюць у сваім сэрцы любоў да сваіх бацькоў, родных і сяброў, да сваёй краіны і да Езуса.

Прыемным сюрпрызам для святога Мікалая сталі спевы калядак на польскай мове ў выкананні старэйшых парафіянак, якім ён у знак удзячнасці таксама ўручыў салодкія пачастункі.

Ала Карнякова-Кучынская
(VGr)