Рэкалекцыі для дзяцей і моладзі пад дэвізам «У сэрцы маім любоў Езуса» адбыліся ў Браславе. Праграму рэкалекцый, якія праходзілі з 5 па 9 жніўня пад кіраўніцтвам кс. Станіслава Мжыглуда і мастачкі Агаты Бараноўскай, рыхтавала моладзь браслаўскай парафіі.

«Мяне здзівіла тое, з якім жаданнем дзеці ішлі на Імшу, — узгадвае Агата Бараноўская. — Нават часам спрачаліся за права ўдзельнічаць у працэсіі з дарамі. Яны адкрывалі для сябе па-новаму Імшу. Мы, разам з маёй сяброўкай (таксама мастачкай) Марыяй Ствол з Лынтупаў, вучылі дзяцей маляваць, жыць у супольнасці. Святары арганізавалі для іх цікавыя эксурсіі па браслаўскім краі. Разам з дзецьмі мы зрабілі калаж і падарылі яго святарам».

Заняткі для моладзі, якая прымала ўдзел у рэкалекцыях, былі накіраваны на непасрэдную падрыхтоўку да прыняцця сакрамэнту канфірмацыі, які будзе ўдзелены Апостальскім Нунцыем арцыбіскупам Клаўдыё Гуджэроцці падчас урачыстасцяў Маці Божай Валадаркі Азёраў у Браславе. Адметна тое, што моладзь сама рыхтавала для сябе свята: рабілі дэкрацыі, вучыліся чытаць чытанні і не баяцца публікі.

***
Гляджу на здымкі з рэкалекцый, а ў сэрцы — туга… Нібыта і сам малюеш на асфальце (дарэчы, у дзяцінстве я ніколі не малявала на асфальце, першы раз спрабавала летась у парку Горкага ў Мінску). І адначасова — радасць: старэйшая моладзь вучыла і вучыць нас, мы вучым малодшых — вопыт жыцця і веры не пыліцца, а квітнее і развіваецца…

Людміла Бурлевіч