Падчас сустрэчы з журналістамі новапасвячаны біскуп Віцебскай дыяцэзіі сказаў, што ўдзячны Богу і Папу Францішку за прызначэнне біскупам, якое сапраўды было як для яго, так і для іншых нечаканасцю. 

 

Біскуп Алег Буткевіч таксама адзначыў, што ў здзяйсненні Божай справы разлічвае на дапамогу святароў, малітвы вернікаў, супрацоўніцтва з уладамі і проста добрымі людзьмі.

 

Падзякаваўшы журналістам за прысутнасць і выкананне сваёй працы, іерарх заўважыў, што “мы ўсе павінны будаваць Божае Валадарства, спаўняючы Яго волю”.

 

Па просьбе журналістаў новы біскуп патлумачыў сэнс свайго герба: 

 

“Калі ўзяць пад увагу маё паходжанне, а паходжу я з Браслава, то тут увогуле не было пытання, што павінна быць на гербе, – абраз Маці Божай Браслаўскай. Праўда, было пытанне аб размяшчэнні герба горада, але хацелася падкрэсліць больш рэлігійнае вымярэнне гэтай сімволікі. Другі момант – Віцебская дыяцэзія. І ў гэтым выпадку не трэба было шмат выдумваць, бо сам герб Віцебскай вобласці мае глыбокае хрысціянскае значэнне – абраз Езуса Хрыста. Злучыўшы іх разам, я думаю, што атрымаўся добры сімвал нашай дыяцэзіі”. 

 

Надпіс жа "Fiat voluntas Tua" падкрэслівае тое, што новы біскуп ва ўсім спадзяецца на волю Бога.

 

 

Акрамя гэтага, новы біскуп падкрэсліў ролю свайго папярэдніка - біскупа Уладзіслава Бліна: “Шчырая яму ўдзячнасць за тое, што я не прыходжу на пустое месца. Бо на Віцебшчыне пабудаваны Касцёл, які мае ўжо 15 гадоў свайго існавання. І гэта яго заслуга, і мая яму ўдзячнасць”.