Сустрэча на тэму «Хлеб наш штодзённы» адбылася 18 мая ў культурна-рэлігійным цэнтры катэдральнага касцёла Езуса Міласэрнага ў Віцебску. Як заўсёды, у ёй прынялі ўдзел вернікі як рыма-каталіцкіх парафій, так і грэка-католікі і праваслаўныя.

Пачалася імпрэза са слова пробашча парафіі Езуса Міласэрнага кс. Адама Дынака. Святар распавёў пра адносіны да хлеба ў Бібліі, звярнуўшы асаблівую ўвагу на тое, што і ў малітве “Ойча наш” прысутнічае просьба пра хлеб.

Цэнтральнае месца імпрэзы заняло выступленне Алены Калядка, парафіянкі віцебскага касцёла Святога Духа, якая выпякае хлеб па старажытным рэцэпце. “Каб спячы такі хлеб, - распавяла выступоўца, - трэба на 7 дзён паставіць закваску, потым тры дні “расце” цеста (гатуецца такі хлеб без дрожджаў), а затым выпякаюцца хлябы”. Такім чынам, каб атрымаўся бохан хлеба, трэба пачакаць 10 дзён, але і вынік таго варты – духмяны пышны хлеб, як было сказана, не параўнаць з набытым у краме, і змяшчае ён толькі натуральныя складнікі: муку, ваду і соль. Удзельнікі сустрэчы змаглі пакаштаваць самаробны хлеб.

З успамінамі і вершамі выступіла Нэля Зайцава. Атмасферу сустрэчы дапоўнілі адказы запрошанай госці на пытанні і сумесная гарбата.

Наступны пункт гадавога плану мерапрыемстваў культурна-рэлігійнага цэнтра – тэматычная экскурсія “Святыні Віцебска”, якую мяркуецца правесці ў першай палове чэрвеня.

Яўгенія Ізотава