5 кастрычніка ў касцёле Нараджэння Найсвяцейшай Панны Марыі ў Відзах шматлікія вернікі парафіі і госці сабраліся разам на святкаванне 100-гадовага юбілею святыні. Ва ўрачыстасцях прымаў удзел і біскуп Віцебскі Алег Буткевіч.
На пачатку святкавання 100-годдзя святыні адна з парафіянак прадставіла прысутным гісторыю відзаўскай парафіі і касцёла.
Затым
біскуп Алег Буткевіч асвяціў два абразы на бакавых алтарах Езуса
Міласэрнага і святога Яна Паўла ІІ, якія былі адмыслова створаны да
100-годдзя святыні мясцовай мастачкай Алінай Трукан.
У гаміліі
біскуп нагадаў, што чыста з чалавечага пункту гледжання гісторыя гэтага
касцёла была нешчаслівай. «Злы нішчыў не толькі будынак касцёла, але і
Касцёл, які складаеце вы, — Касцёл з чалавечых сэрцаў. Гэта дом, які мы
будуем, і ў яго не можа быць іншага фундаменту, апрача таго, які ўжо
ёсць — якім з’яўляецца Езус Хрыстус. І таму гэты касцёл мусіць стаць тым
вуглавым камнем», — сказаў віцебскі ардынарый.
Іерарх
нагадаў, што гэтая парафія дала і свой плён — гэта прысутныя на
ўрачыстасці святары Генадзь Ляўкоў і Эдвард Нарадоўскі, якія служаць у
сваёй роднай дыяцэзіі, сястра Тэрэза Абалевіч — вядомы доктар філасофіі,
ксёндз Генрых Дамашка, які трагічна загінуў некалькі гадоў таму.
Таксама
ў гаміліі біскуп заклікаў прысутных, каб «сярод штодзённых абавязкаў і
клопатаў памяталі пра сваё прызначэнне». «Мудрасць кажа, што ў нашай
уладзе паспрабаваць змяніць нас саміх. І калі я змяняюся сам, перамяняю
свае сэрца — змяняецца свет вакол мяне», — зазначыў віцебскі ардынарый.
Іерарх
пажадаў, каб «гэтая святыня, якая нагадвае чалавека, што ўзносіць свае
рукі да Бога, была напоўнена жывой, шчырай людской малітвай, малітвай
падзякі і праслаўлення Усемагутнаму Богу за Яго любоў».
Падчас
Імшы сто вернікаў прынялі сакрамэнт канфірмацыі. Біскуп Алег Буткевіч
адзначыў сімвалічнасць гэтай лічбы, што, паводле яго слоў, у пэўнай меры
стала працягам акцыі ў відзаўскай парафіі «Зрабі сто добрых учынкаў» і
марафону на сто кіламетраў ад капліцы да капліцы з малітвай.
Пасля
Імшы біскуп асвяціў памятны камень, усталяваны каля касцёла ў гонар
стагоддзя святыні і стагоддзя з дня нараджэння кардынала Казіміра
Свёнтка, а таксама як напамін аб 25-годдзі святарства пробашча кс.
Альфрэда Пяхоты і вікарыя кс. Зянона Шчонхара — місіянераў салятынцаў.
Абодва святары служаць у Беларусі 24 гады.
На заканчэнне ўрачыстасці выступіў хор з Глыбокага, які выканаў духоўныя спевы.
Парафіяне
Ці
не найбольш цешыліся на ўрачыстасці старэйшыя парафіяне, усё жыццё якіх
было цесна звязана з гэтай святыняй, якія былі сведкамі яе росквіту,
закрыцця, а потым адраджэння. Маці Веры Бражэвіч, Малання, яшчэ
падлеткам дапамагала пры пабудове касцёла — «цаглінкі насіла». У 1989 г.
і на пачатку 1990-х сама Вера дапамагала пры рамонце касцёла.
Альдона
Макоўская, у дзявоцтве Ліманоўская, у 1944 годзе прымала ў гэтым
касцёле Першую Камунію. Яна ўспамінае і падзеі 1950 года, калі ў
вернікаў забралі касцёл: «Я была падлеткам, не вельмі добра гэта
памятаю, але помню, што тады плакалі ўсе...» Потым яна доўгі час
ездзіла ў касцёлы ў Літву і ў вёску Далёкія. Шмат радасці было, калі
відзаўскі касцёл, нарэшце, аддалі вернікам. «Народу шмат прыходзіла.
Молімся, а на на нас снег сыпецца, і галкі лётаюць», — успамінае яна
1989 год. Але вернікі вытрывалі, чысцілі, прыбіралі, дапамагалі і,
нарэшце, дачакаліся 100-годдзя святыні.
Цуд адбыўся: храм наш уваскрос. З абразоў глядзіць Хрыстос. Продкаў памяць, продкаў дух жыве. Меладычны ў небе спеў плыве.
Час надзеі і выпрабаванняў
Сённяшні касцёл у Відзах быў пабудаваны ў 1904–1914 гг. з чырвонай цэглы ў цэнтры мястэчка паводле праекту архітэктара Л. Вітан-Дубейкаўскага. Аднак у год заканчэння будаўніцтва пачалася Першая сусветная вайна. У выніку ваенных дзеянняў у 1916 годзе касцёл моцна пацярпеў: былі пашкоджаны дах, вокны, сцены, падлога, адна з вежаў. Намаганнямі вернікаў касцёл быў цалкам адрамантаваны толькі да 1932 года.