Напярэдадні святаў Божага Нараджэння ў Віцебскай дыяцэзіі распачаўся ХІІІ фестываль «Дні хрысціянскай культуры». 20 снежня ў катэдральным касцёле Езуса Міласэрнага адкрылася выстава прац дзіцячай творчасці навучэнцаў сярэдіх школ №40, 45 і гімназіі №8, а таксама студыі «Фларыяль».

Настаўнікі і вучні падрыхтавалі святочную імпрэзу: чыталі вершы, настаўніца Людміла Богадухава выканала песню «Ноч на Ражство», настаўніца Людміла Швед правяла віктарыну-гульню з пытаннямі аб традыцыях святкавання Божага Нараджэння.

Наведаў выставу і паўдзельнічаў у святочнай імпрэзе біскуп Віцебскі Алег Буткевіч. Іерарх распавёў дзецям аб сэнсе Божага Нараджэння для кожнага чалавека, аб веры ў жыцці і творчасці. Віцебскі ардынарый высока ацаніў працы маленькіх творцаў і ўзнагародзіў іх дыпломамі, а затым запрасіў усіх за салодкі стол.

Традыцыйна ў фестывалі бярэ ўдзел клуб фларыстаў «Анюта», ад імя якога сабраных павіншавалі са святамі Святлана Жылінская і Людміла Голубева. Навучэнцы студыі «Фларыяль» (кіраўнік Наталля Варабчук) прадставілі прысутным дэфіле.

Для дзяцей, якія вучацца ў школах, пабудаваных побач з касцёлам, стала добрай традыцыяй святкаваць Божае Нараджэнне разам з сям’ёй і сваімі настаўнікамі ў святыні.

Людміла Ярмолава