Напярэдадні Божага Нараджэння ў кляштары сясцёр эўхарыстак у Друі (Віцебская дыяцэзія) адбылася святочная вячэра – куцця. Гасцямі па традыцыі сталі выхаванцы мясцовага дзіцячага дома, якія засталіся на зімовыя школьныя канікулы ў Друі.

Вячэра рыхтавалася загадзя з актыўным удзелам і дапамогай саміх дзяцей, якія з’яўляюцца частымі гасцямі ў кляштары. Сёстры на працягу навучальнага года не толькі збіраюць дзяцей на заняткі рэлігіі, але таксама вучаць іх весці хатнюю гаспадарку і быць больш падрыхтаванымі да дарослага жыцця.

Сястра Наталля Арлянковіч SJE распавядае: “Мы пачынаем ад самага простага - вучым заварваць гарбату, дадаваць туды цукар, прыбірацца за сабою, сачыць за асабістай чысцінёй, гатаваць ежу. Спадзяемся, што ўсё гэта ім дапаможа потым”.

На працягу гадоў сёстры эўхарысткі з дазволу бацькоў дзяцей і дырэкцыі дзіцячага дома падрыхтавалі многіх выхаванцаў да святых сакрамэнтаў. Некаторыя дзеці былі ахрышчаны ў друйскім касцёле, значная колькасць з іх прыступілі да Першай святой Камуніі. Дзеці наведваюць таксама нядзельныя і святочныя Імшы, а некаторыя хлопцы з дзіцячага дома прыслугоўваюць ля алтара ў якасці міністрантаў.

Урачыстую вячэру распачаў пробашч парафіі кс. Сяргей Сурыновіч. Пасля малітвы святар звярнуўся да дзяцей з заклікам зберагчы Хрыста, які нарадзіўся, праз усё сваё жыццё, бо Ён – той, у каго заўсёды можна знайсці суцяшэнне і падтрымку.

На працягу вячэры дзеці спявалі калядныя песні, а пад яе завяршэнне іх наведаў святы Мікалай са святочнымі падарункамі.

(AG)

Фота с. Наталлі Арлянковіч SJE