У Браславе працягваецца Х сустрэча моладзі Віцебскай дыяцэзіі. Трэці дзень сустрэчы пачаўся малітвай, падчас якой духоўныя асобы і маладыя людзі прасілі Бога адкрыць іх сэрцы, даць пачуць усё тое, што Ён хоча сказаць, а таксама аб патрэбных ласках для кожнага з іх і благаслаўленні на чарговы дзень сустрэчы.

Тэмай дня было пакаянне. Айцец Аляксандр Жарнасек МІС звярнуўся да старэйшай моладзі з такімі словамі: “Калі мы грашым, то перастаем верыць у Бога. Мы павінны змяняць сваё жыццё. Трэба прымаць Езуса, бо Ён прымае і любіць нас такімі, якімі мы ёсць. Калі не будзем каяцца за свае грахі — загінем. Таксама трэба больш маліцца і слухаць Божае слова, мець адносіны з Богам і падпарадкоўвацца Яму. Кожны дзень мы павінны казаць Богу: “Прабач мне” і не быць ганарлівымі. Пан хоча нашай вернасці. Калі мы перажываем навяртанне, то павінны разумець, што трэба быць Яму паслухмянымі”.

“Хто такі Пан? Пан — гэта той, хто пануе. Ён павінен быць для нас аўтарытэтам. Хопіць таго, каб мы мелі словы вечнага жыцця, і больш нічога не трэба”, — сказаў святар. Таксама а. Аляксандр Жарнасек адзначыў, што, калі мы не чытаем і не ведаем Евангелля, то мы не ведаем Хрыста. “Трэба рэальна пазнаць Яго словы, што Ён хоча сказаць кожнаму з нас. Не трэба жыць у ілюзіях, трэба прызнаваць Яго сваім настаўнікам. (…) Калі мы хочам паступіць у ВНУ, каледж, то трэба спытаць найперш у Пана, ці хоча Ён гэтага, папрасіць благаслаўлення. А таксама галоўнае - трэба навучыцца стаяць на каленях, - дадаў святар. - Калі мы перажываем споведзь і нават шчыра каемся, то ёсць свядомасць, што станем лепшымі. Калі ты памрэш у сабе, то і Бог будзе жыць у табе”.

Напрыканцы дня гурт “Рыбы” і моладзь праслаўлялі Бога за тое, што Ён любіць і клапоціцца пра кожнага, дзякавалі за гэты дзень, за Маці Божую і сваю маці.

На вячэрняй малітве прысутнічаў біскуп Віцебскі Алег Буткевіч, які благаславіў усіх прысутных на ноч.

Паводле catholicnews.by

(AG)

Фота catholicnews.by