17 кастрычніка моладзь Віцебскай дыяцэзіі сабралася на начное чуванне ў полацкай парафіі. На сустрэчу прыбылі маладыя людзі з Браслава, Глыбокага, Мёраў, Віцебска, Варапаева, Слабодкі, Друі, Верхнядзвінска і іншых месцаў.

Разнастайнасць удзельнікаў можна было заўважыць ужо спачатку на прадстаўленні парафій. Сябе і свае парафіі яны прадстаўлялі хтосьці спевам, хтосьці аповедам, хтосьці слайдамі.

Ксёндз Аляксандр Грыцкевіч прамовіў канферэнцыю пра Божую Міласэрнасць, падчас якой кожны з удзельнікаў чування мог заўважыць у абразе Міласэрнага Езуса штосьці асаблівае для сваёй душы.

Падчас пакутнага набажэнства, якое падрыхтаваў ксёндз Юрый Жаўняровіч і моладзь мёрскай парафіі, можна было зрабіць рахунак сумлення і ў цішы каяцца ў сваіх грахах і занядбаннях. Сімвалам пакаяння і вяртання да Бога былі маленькія свечкі, запаленыя ад вялікай, якія запальвалі тыя, хто прыступіў да сакрамэнту пакаяння і проста шчыра прасіў прабачэння ў Бога за свае грахі.

Падчас адарацыі Найсвяцэйшага Сакрамэнту моладзь малілася не толькі разважаннямі, спевамі на розных мовах, але і танцам, звяртаючы свае просьбы, падзякі, малітвы, пытанні да Езуса, прысутнага ў Найсвяцейшым Сакрамэнце.

Святую Імшу ўзначаліў біскуп Віцебскі Алег Буткевіч. У гаміліі іерарх нагадаў моладзі пра тое, як трэба змагацца са спакусамі сённяшняга свету і што значыць быць сапраўды вольным чалавекам.

Мелі месца таксама тэатральныя пастаноўкі, якія падрыхтавала моладзь з Мёраў і Браслава і галоўнай думкай якіх былі ўсемагутнасць і міласэрнасць Бога ў праблемах сучаснага чалавека. Разважаючы над прыпавесцю пра блуднага сына, моладзь прадставіла асабістыя праблемы, перажыванні, пытанні; некаторыя маглі знайсці свае ўласныя праблемы і даверыць іх Міласэрнаму Айцу.

Падчас гадзіны Міласэрнасці разважалі над словамі, якія Езус казаў святой сястры Фаўстыне пра Божую Міласэрнасць, і маліліся Вяночкам.

Скончылася чуванне малітвай Ружанца. Час быў насычаны малітвай, разважаннямі і супольным прабываннем у добрым настроі.

С. Таццяна Гмыза SJE, (AG)