15 лістапада касцёл Найсвяцейшай Тройцы ў Плюсах (Віцебская дыяцэзія) адзначыў 100-гадовы юбілей. Невялікая вёска Плюсы, якая знаходзіцца на мяжы з Латвійскай Рэспублікай, у гэты дзень была напоўнена людзьмі.

На ўрачыстасці, якую ўзначаліў біскуп Віцебскі Алег Буткевіч, сабралося шмат вернікаў не толькі з мясцовай парафіі, але і з Браслава, Слабодкі, шмат гасцей з суседняй Латвіі і іншых маленькіх вёсак і хутароў. Таксама прысутнічалі святары з суседніх парафій.

Касцёл у Плюсах мае багатую і трагічную гісторыю, нягледзячы на тое, што па астранамічных мерках сто гадоў – невялікі кавалак часу, зазначыў біскуп Алег Буткевіч. Святыня перажыла як росквіт, так і заняпад падчас вайны, знявагу і знішчэнне, рамонт і аднаўленне.

Парафіяне ўзгадалі не толькі пра гісторыю касцёла, але і пра святароў, якія, працуючы там, не пабаяліся выпрабаванняў і да апошніх хвілін жыцця былі адданыя Богу і пакліканню. Біскуп Алег Буткевіч падкрэсліў, што, хоць яны і не далучаны афіцыйна да ліку святых, павінны быць для людзей прыкладам.
 
У гаміліі іерарх звярнў увагу, што святыня не павінна быць толькі месцам, дзе хрысціяне спаўняюць свае абавязкі: іх сюды павінен прыводзіць Дух Святы, святыня павінна жыць.

Падчас урачыстасці 15 маладых людзей атрымалі сакрамэнт канфірмацыі.

Імша завяршылася словамі падзякі парафіян і ксяндза Казіміра Акушкі, які з 2002 года з’яўляецца пробашчам парафіі, спевам гімна «Магутны Божа» і пастырскім благаслаўленнем.

Падчас Другой сусветнай вайны непадалёк ад Плюсаў праходзіла лінія фронту, і адна з вежаў касцёла вельмі пацярпела. Пасля вайны ўлады не захацелі вяртаць касцёл вернікам і арганізавалі ў ім школу, а потым краму. Святыню вярнулі католікам у 1989 годзе, на іх жа сродкі яна ў 1990-я гг. была адрамантавана.

У парафіі ў Плюсах на пачатку XX ст. служылі кс. Малахоўскі, кс. Казімір Сяндоўскі, кс. Пётр Вацякунас (пахаваны на мясцовых могілках), кс. Ігнат Мантвіла, кс. Станіслаў Мажэйка, кс. Ян Жук, кс. Казімір Радзішэўскі і кс. Францішак Більша, арыштаваны камуністычнымі ўладамі.

Паводле waladarka.by
Фота Алены Шаліма

(AG)