IV Дыяцэзіяльная сустрэча моладзі ў Браславе: духавенства супраць свецкіх

Беларусь - Віцебская дыяцэзія

21.08.2009 20:00

«На Беларусі Бог жыве» — сцвярджаў Уладзімір Караткевіч. Сёння гэтыя словы ўсё часцей можна пачуць з вуснаў каталіцкай моладзі. Бо Касцёл — гэта вернікі ўсяго свету і кожнай краіны паасобку. Гэта ўсе парафіяне беларускіх дыяцэзій, гэта я і ты, гэта кожны, хто верыць ва Усемагутнага Бога і давяраецца Яго бязмежнай міласэрнасці. Але пра тое, што Бог жыве ў нас, сведчыць таксама і актыўнае жыццё Касцёла. І сёння ўсё часцей можна заўважыць, як Касцёл выходзіць па-за межы парафій і на ўвесь свет кажа пра Хрыста. Не толькі словамі, але радасцю і любоўю, якой хоча падзяліцца з кожным. У 2006 г. у Браславе ўпершыню адбылася сустрэча моладзі Віцебскай дыяцэзіі. І ўжо тады ўзнікла адна з яе добрых традыцый: футбольны матч «Духавенства — свецкія». IV Дыяцэзіяльная сустрэча моладзі не стала выключэннем. І святары, і клерыкі аб’ядналі свае сілы супраць каманды моладзі. Матч адбываўся (як і заўсёды) на гарадскім стадыёне, таму паглядзець на ігру і пабалець за каманды прыйшлі таксама і гаражане. А гэта ж насамрэч вельмі цікава і захапляльна: паглядзець на святароў з іншага боку, убачыць іх у нязвыклым відзе дзейнасці. Убачыць іх не ў сутанах, альбах ды начышчаных ботах, а ў шортах, футболцы і пазычаных у кагосьці кедах. Праўда, сёлета адна з традыцый была парушана: перамогу атрымалі не як зазвычай духоўнікі, а каманда моладзі з лікам 7:4. Але вось цікава: ёсць перамога, але няма пераможаных, бо так заўсёды, калі з намі Бог. А калі вы яшчэ не зразумелі, як мой уступ звязаны з футбольным матчам, то запрашаю вас на сустрэчу моладзі ў Браслаў у наступным годзе, каб адчуць, што Касцёл на Беларусі жыве! Святлана Бурлевіч                         Фота кс. А. Амяльчэні