16 кастрычніка 2009 г. Святы Айцец Бэнэдыкт XVI удзяліў аўдыенцыю прэм’ер-міністру Украіны Юліі Цімашэнка. Як паведаміла Прэс-служба Апостальскай Сталіцы, падчас сустрэчы абмяркоўваліся крокі, здзейсненыя Каталіцкім Касцёлам у дачыненні да ўкраінскага грамадства, у прыватнасці ў галіне адукацыі і распаўсюджвання агульначалавечых і хрысціянскіх каштоўнасцей.

Падчас аўдыенцыі, якая працягвалася 30 хвілін, былі ўзняты таксама тэмы, звязаныя з распаўсюджваннем міру і ўсталяваннем міжнароднага супрацоўніцтва, асабліва ў Еўропе, а таксама адносіны паміж дзяржаўнымі і рэлігійнымі ўладамі. Святы Айцец выказаў надзею, што пытанні, якія яшчэ не былі вырашаны, могуць быць вырашаны сёння.

Як паведамляе інфармацыйнае агенцтва «Интерфакс», перад аўдыенцыяй у размове з прадстаўнікамі ўкраінскай супольнасці ў Рыме Юлія Цімашэнка паведаміла, што збіраецца абмеркаваць з Пантыфікам адносіны паміж Касцёлам і дзяржавай і абмяняцца думкамі наконт мераў, якія прымаюцца ў свеце з мэтай умацавання маральных каштоўнасцей.

Варта адзначыць, што Юлія Цімашэнка з’яўляецца кандыдатам на пост Прэзідэнта Украіны. Выбары Прэзідэнта павінны адбыцца ў 2010 г.

Насельніцтва Украіны складае больш за 46 мільёнаў жыхароў, большасць з якіх праваслаўныя. Менш за 10% насельніцтва належаць да Каталіцкага Касцёла, а пераважную частку з іх складаюць грэка-католікі, якія зведалі пераслед у гісторыі краіны.