Увечары 11 лютага 2010 г. працэсія з рэліквіямі святой Бэрнардэты Субіру і фігурай Маці Божай Фацімскай, якая праходзіла ў Апостальскай Сталіцы з нагоды ўрачыстасці Маці Божай з Люрда і XVIII Сусветнага дня хворага, завяршыла свой шлях пад вокнамі папскага палаца на плошчы Святога Пятра. Святы Айцец Бэнэдыкт XVI з вокнаў палаца ўдзяліў благаслаўленне сабраным на плошчы хворым і іх апекунам.

Падчас благаслаўлення Папа, як і ўдзельнікі працэсіі, трымаў у руках свечкі. У слове, звернутым да вернікаў, Пантыфік падзякаваў прысутным за іх малітву, любоў да хворых і да Пана Бога.

Рэліквіі св. Бэрнардэты, прывезеныя ў Рым з нагоды ўрачыстасці, знаходзіліся ў ватыканскай базыліцы на працягу святой Імшы, якую цэлебраваў Бэнэдыкт XVI у інтэнцыі хворых і іх апекуноў.