Падчас сённяшняй агульнай аўдыенцыі ў Апостальскай Сталіцы Святы Айцец Бэнэдыкт XVI заклікаў вернікаў да малітвы ў інтэнцыі працы Міжнароднай камісіі па справах тэалагічнага дыялога паміж Рыма-каталіцкім Касцёлам і Праваслаўнай Царквой, пасяджэнне якой адбываецца ў гэтыя дні ў Вене (Аўстрыя).

 

Тэмай пасяджэння камісіі з’яўляецца роля біскупа Рыма ў Паўсюдным Касцёле ў першае тысячагоддзе хрысціянства. «Паслухмянасць волі Пана Езуса і існаванне важных выклікаў, якія стаяць сёння перад хрысціянствам, абавязваюць нас да сур’ёзнага ўдзелу ў справе вяртання поўнай камуніі паміж Цэрквамі», — падкрэсліў падчас агульнай аўдыенцыі Папа. Святы Айцец заахвоціў усіх вернікаў да «руплівай малітвы ў інтэнцыі працы камісіі і нястомнага развіцця і ўзмацнення міру і згоды паміж ахрышчанымі, каб мы маглі даць свету сапраўднае евангельскае сведчанне».