Падобна як у мінулым годзе, летні адпачынак Святы Айцец Бэнэдыкт XVI правядзе сёлета ў Кастэль Гандольфа (прыгарад Рыма). Адпаведную інфармацыю падала Прэфектура Папскага дома.

3 ліпеня 2011 г., у нядзелю, у апошні раз перад ад’ездам у сваю летнюю рэзідэнцыю Папа сустрэнецца з вернікамі на малітве «Анёл Панскі» на плошчы Св. Пятра ў Рыме. На працягу ліпеня агульных аўдыенцый праводзіцца не будзе, і яны зноў распачнуцца ў жніўні. 21 жніўня Пантыфік прыбудзе ў Мадрыд (Іспанія) на святкаванне Сусветнага дня моладзі.

На 4 і 18 верасня запланаваны дзве нядзельныя сустрэчы Папы з вернікамі ў Кастэль Гандольфа. У гэтым жа месяцы Святы Айцец наведае Германію. Агульныя аўдыенцыі пройдуць 7, 14 і 28 верасня.

Чакаецца, што летні адпачынак Папа прысвеціць працы над трэцяй часткай кнігі «Езус з Назарэта», якая будзе ахопліваць перыяд дзяцінства Хрыста і час перад Яго публічнай дзейнасцю.