У Ватыкане была абнародавана праграма вераснёўскага візіту Святога Айца Бэнэдыкта XVI у Ліван, падчас якога будзе падпісаны і афіцыйна прэзентаваны Апостальскі зварот па выніках Сінода Біскупаў па Блізкім Усходзе.

Апостальскае падарожжа распачнецца 14 верасня, калі Пантыфік выляціць з Рыма ў Бейрут. Адтуль Папа накіруецца ў Харысу, дзе ў базыліцы св. Паўла, якая належыць католікам мельхіцкага абраду, падпіша паслясінадальную адгартацыю.

У межах візіту Святы Айцец сустрэнецца з Прэзідэнтам і прэм’ер-міністрам Лівана, з кіраўнікамі мусульманскіх супольнасцяў, прадстаўнікамі свету культуры і навукі.

У апошні дзень пілігрымкі, 16 верасня, Бэнэдыкт XVI накіруецца ў Бейрут, дзе ўзначаліць літургію.