7 верасня Святы Айцец Бэнэдыкт XVI удзяліў аўдыенцыю новапрызначаным біскупам з місіянерскіх краін, якія ўдзельнічаюць у фармацыйным курсе, арганізаваным Кангрэгацыяй Евангелізацыі Народаў. Папа заахвоціў іерархаў да руплівай душпастырскай працы.

Кажучы пра памяншэнне ў апошні час колькасці місіянераў, якіх, аднак, замяняе мясцовае духавенства, Пантыфік адзначыў, што гэтая з’ява стварае новыя формы місійнага супрацоўніцтва. Некаторыя маладыя лакальныя Касцёлы пачалі высылаць сваіх святароў у іншыя Касцёлы, дзе не хапае духавенства. «Гэтая камунія павінна заўсёды ажыўляць евангелізацыйную дзейнасць», — падкрэсліў Святы Айцец і дадаў, што маладыя Касцёлы — знак надзеі для будучыні Паўсюднага Касцёла.

Святы Айцец у размове з новапрызначанымі іерархамі звярнуў увагу на інкультурацыю веры, фармацыю кандыдатаў да святарства, клопат аб дыяцэзіяльным духавенстве, падрыхтоўку законннікаў і законніц, а таксама на працу са свецкімі. «Місіянерства патрабуе душпастыраў, якія наследуюць Хрыста ў святасці жыцця, разважлівасці, дальнабачнасці, гатоўнасці шчыра прысвяціць сябе Евангеллю, у сэрцы якіх жыве клопат пра ўсе Касцёлы», — адзначыў Пантыфік.

Папа заахвоціў новапрызначаных біскупаў клапаціцца пра давераных ім святароў і глядзець на сучасны свет вачыма веры, каб глыбока зразумець яго. Таксама Пантыфік заклікаў іерархаў будаваць еднасць з людзьмі нашых часоў, а перад абліччам разнастайных выклікаў і цяжкасцяў давяраць Евангеллю, якое можа пабудзіць да будавання новага братэрства і еднасці.

«Вера — найкаштоўнейшы дар, які мы атрымалі. Мы не можам захоўваць яго толькі для сябе. Усе маюць права даведацца пра каштоўнасць гэтага дару і прыняць яго», — дадаў Святы Айцец.