Сакральная музыка можа ўмацоўваць веру і дапамагаць новай евангелізацыі. Гэта падкрэсліў Святы Айцец Бэнэдыкт XVI падчас сустрэчы з членамі італьянскай «Асацыяцыі св. Цэцыліі» 10 лістапада ў Ватыкане. Гаворачы аб тым, як музыка ўплывае на веру чалавека, Папа нагадаў св. Аўгустына, навяртанню якога паспрыяла слуханне псальмаў і гімнаў падчас літургіі, якую ўзначальваў св. Амброзій.

Па словах Пантыфіка, добрая музыка аблягчае ўспрыняцце Божага слова і надае псальмам і біблійным спевам большую камунікатыўную моц. Папа дадаў, што «сакральныя спевы з’яўляюцца неабходнай і інтэгральнай часткай урачыстай літургіі» — «не з эстытычных прычын, але таму, што дапамагаюць умацоўваць і выражаць веру і такім чынам хвалу Бога і асвячэнне вернікаў, што з’яўляецца мэтай сакральнай музыкі».

Іншым аспектам, на які звярнуў увагу Бэнэдыкт XVI, з’яўляецца роля сакральнай музыкі ў новай евангелізацыі. Паводле Святога Айца, сакральная музыка можа паспрыяць абноўленаму «адчуванню смаку хрысціянскага паслання і таямніц веры». Пантыфік падкрэсліў, што многія людзі адкрывалі для сябе Бога дзякуючы прыгажосці сакральнай музыкі, пачутай падчас літургіі, як, напрыклад, французскі пісьменнік Поль Кладэль.

«Тут, дарагія сябры, вы маеце важную ролю: старайцеся палепшыць якасць літургічных спеваў, не баючыся аднаўляць і развіваць вялікія музычныя традыцыі Касцёла, якія ў грыгарыянскім спеве і паліфаніі маюць два сваіх самых вялікіх выразы», — заклікаў італьянскіх музыкантаў Папа, словы якога прыводзіць Ватыканскае радыё.

(AG)