Рым рыхтуецца да прыняцця вялікай колькасці вернікаў і турыстаў у перыяд з канца лютага і да пачатку красавіка. Гэта звязана з жаданнем пілігрымаў з усяго свету ўдзельнічаць у апошніх мерапрыемствах, якія правядзе Святы Айцец Бэнэдыкт ХVI перад сыходам з Пасаду св. Пятра, а таксама з увагай да будучага канклаву і ўрачыстасці інтранізацыі новага Папы.

Як інфармуе Ватыканскае радыё, гарадскія службы Вечнага Горада абвясцілі, што ў нядзелю 24 лютага, калі Бэнэдыкт ХVI апошні раз сустрэнецца з вернікамі на малітве «Анёл Панскі», будзе зменены расклад працы гарадскога транспарту, паміж Ватыканам і важнейшымі пунктамі ў горадзе будуць курсаваць дадатковыя аўтобусы.

Паводле ўладаў Рыма, найбольшым выклікам для іх будзе апошняя агульная аўдыенцыя з удзелам Папы ў сераду 27 лютага, на якую прыбудуць дзясяткі тысяч вернікаў з многіх краін свету. Таксама чакаецца прыбыццё вялікай колькасці пілігрымаў на падзеі Вялікага тыдня і ўрачыстасць Вялікадня, якія, магчыма, узначаліць ужо новы Пантыфік.

(AG)