«Карупцыянер выклікае гнеў Бога і абражае народ Божы», — падкрэсліў Папа Францішак 17 чэрвеня 2014 г. падчас ранішняй св. Імшы. Ён звярнуўся да гісторыі біблійнага Набота, які стаў ахвярай караля Ахаба і заявіў, што для карупцыянераў ёсць толькі адно выйсце «прасіць прабачэння», у адваротным выпадку прыйдзецца сутыкнуцца з Божым гневам.

16 чэрвеня Папа Францішак сустрэўся з кіраўніком Англіканскай Царквы архіепіскапам Джасцінам Уэлбі, які прыбыў у Рым з трохдзённым візітам. Пасля кароткай прыватнай размовы і прадстаўлення дэлегацый Святы Айцец звярнуўся да гасцей з прамовай, у якой адзначыў, што моліцца ў інтэнцыі ўмацавання сяброўскіх адносін і супольных намаганняў на карысць прымірэння і адзінства паміж усімі веруючымі ў Хрыста.