2 красавіка 2013 г. у сусветнавядомым рымскім касцёле Il Gesù — Найсвяцейшага Імя Езуса — адбыліся дыяканскія пасвячэнні семінарыстаў, якія належаць да Таварыства Езуса, езуітаў. Сярод 13 кандыдатаў былі прадстаўнікі розных краін, сярод якіх і наш суайчыннік Віктар Жук, які паходзіць з Пінска.

Літургію ўзначаліў кардынал Джанфранка Равазі, старшыня Папскай рады па культуры. Сваё спецыяльнае віншаванне новым дыяканам езуітам скіраваў папа Францішак.

Дыякану Віктару Жуку 33 гады, ён нарадзіўся і вырас у Пінску. Пасля таго, як скончыў эканамічны факультэт Люблінскага каталіцкага ўніверсітэта, адчуў пакліканне да манаскага жыцця. У 2003 годзе ўступіў у навіцыят расійскага рэгіёну Таварыства Езуса ў Навасібірску. Вывучаў філасофію ў Падуі. Душпастырскую практыку праходзіў у Мілане, адначасова супрацоўнічаў з італьянскімі езуітамі ў ініцыятывах для моладзі. З 2010 г. вывучае тэалогію ў Рыме.

Даведка
Дыякан можа ўрачыста ўдзяляць хрост, ад імя Касцёла дапамагаць пры ўдзяленні сужэнства і благаслаўляць яго, чытаць Святое Пісанне верным, настаўляць і заахвочваць народ, кіраваць набажэнствам і малітвай вернікаў, здзяйсняць сакрамэнталіі, кіраваць абрадам пахавання.

Кс. Юрый Жаўняровіч