У гэтым годзе ў Беларусі стала на 20 святароў больш, а таксама было пасвечана 6 дыяканаў.

Якія даты сыходзячага года сталі знакавымі і вельмі важнымі для беларускіх каталіцкіх новапрэзбітэраў і дыяканаў?

rВясновыя пасвячэнні: папаўненне ў марыянаў, сэрцанаў і палатынцаў

• 8 сакавіка ў Оршы атрымалі прэзбітэрскае пасвячэнне дыяканы Канстанцін Анашка і Вадзім Мізер. Пасвячэнне ўдзяліў біскуп Віцебскі Алег Буткевіч.

• 3 мая ў санктуарыі Маці Божай Валадаркі Азёраў у Браславе адбылося прэзбітэрскае пасвячэнне дыяканаў Яна Кароткіна і Аляксандра Фядотава з манаскай супольнасці айцоў сэрцанаў. Пасвячэнне ўдзяліў біскуп Віцебскі Алег Буткевіч.

• 10 мая касцёл атрымаў трох новых беларускіх святароў, якія належаць да супольнасці палатынцаў: кс. Дзяніса Крываносава SAC і кс. Юзафа Парфяновіча SAC, якія паходзяць з Талачына, і кс. Яўгенія Эйсманта SAC, які паходзіць з Воранава. Прэзбітэрскае пасвячэнне яны прынялі сярод 8 палатынцаў ў Олтажаве (Польшча) з рук Апостальскага Нунцыя ў Польшчы арцыбіскупа Чэлесціно Мільёрэ.

Пасвячэнні ўлетку: з'явіўся першы езуіт у сучаснай гісторыі Беларусі

• 21 чэрвеня ў архікатэдральным касцёле Імя Найсвяцейшай Панны Марыі ў Мінску падчас святой Імшы тром дыяканам было ўдзелена прэзбітэрскае пасвячэнне Мітрапалітам Мінска-Магілёўскім арцыбіскупам Тадэвушам Кандрусевічам. У гэты дзень святарамі сталі: Раман Суша, што паходзіць з парафіі Узвышэння Святога Крыжа ў Вілейцы; Андрэй Калядка з парафіі Св. Вацлава ў Ваўкавыску; Юзаф Сярпейка з парафіі Св. Міхала Арханёла.

• 24 чэрвеня ў Пінску на ўрачыстасць Нараджэння Яна Хрысціцеля адбылося прэзбітэрскае пасвячэнне дыякана Юрыя Дразда з парафіі Святога Казіміра ў Жлобіне — сёлетняга выпускніка Міждыяцэзіяльнай вышэйшай духоўнай семінарыі ў Пінску. Прэзбітэрскае пасвячэнне было ўдзелена біскупам Пінскім Антоніем Дзям’янкам.

• 14 жніўня прыняў прэзбітэрскае пасвячэнне дыякан Віктар Жук SJ – першы езуіт у сучаснай гісторыі Беларусі. Пасвячэнне ўдзяліў у мінскім архікатэдральным касцёле Імя Найсвяцейшай Панны Марыі Мітрапаліт Мінска-Магілёўскі арцыбіскуп Тадэвуш Кандрусевіч.

Увосень стала на аднаго францішканіна больш

• 13 верасня ў Івянцы прэзбітэрскае пасвячэнне прыняў дыякан Яўген Голуб OFMConv. Пасвячэнне ўдзяліў Мітрапаліт Мінска-Магілёўскі арцыбіскуп Тадэвуш Кандрусевіч.

• 8 лістапада ў гродзенскім катэдральным касцёле св. Францішка Ксаверыя біскуп Гродзенскі Аляксандр Кашкевіч удзяліў прэзбітэрскае пасвячэннe пяці навучэнцам Вышэйшай духоўнай семінарыі ў Гродне. Пасвячэнне атрымалі кс. Аляксандр Вараб’ёў, кс. Дзмітрый Леўчык, кс. Павел Раманоўскі, кс. Аляксандр Сямінскі i кс. Марэк Занеўскі.

Зімовае – новае

• 6 снежня ў мінскім архікатэдральным касцёле Імя Найсвяцейшай Панны Марыі адбылося прэзбітэрскае пасвячэнне дыякана Віталія Стрыгі. Пасвячэнне ўдзяліў Мітрапаліт Мінска-Магілёўскі арцыбіскуп Тадэвуш Кандрусевіч.

• 6 снежня шасцёра навучэнцаў Вышэйшай духоўнай семінарыі ў Гродне прынялі дыяканскае пасвячэнне з рук біскупа Гродзенскага Аляксандра Кашкевіча. Дыяканамі сталі: Андрэй Белаблоцкі, Павел Скуба, Дзмітрый Папянюк, Часлаў Ладыка, Ян Варанецкі і Віталь Петкевіч.

• 11 снежня ў пінскай катэдры адбылося прэзбітэрскае пасвячэнне дыякана Юрыя Пракапюка, якое ўдзяліў біскуп Пінскі Антоні Дзям’янка.

(AYU)