«Той, хто атрымлівае пасвячэнне, падае на твар, усім целам, ілбом датыкае падлогі святыні, і ў такой паставе выяўляецца вызнанне якойсьці цалкавітай гатоўнасці да службы, што будзе яму даверана».

Цырымонія гэта пакінула глыбокі след у маім святарскім жыцці. Калісьці, праз гады, у базыліцы св. Пятра, на пачатку Сабору, маючы перад вачыма гэты момант прэзбітэрскага пасвячэння, я напісаў паэтычны твор, фрагмент якога тут варта прывесці:

Гэта Ты, Пётр. Хочаш быць тут Падлогаю,
                каб па Табе праходзілі...
Каб ішлі там, дзе кіруеш іх крокі...
Хочаш быць Тым, хто служыць нагам —
                як скала капыткам авечак:
Скала — гэта таксама падлога гіганцкай святыні.
                Пашай з’яўляецца Крыж.

«Пішучы гэтыя словы, — узгадвае ў сваёй кнізе "Дар і таямніца", з якой і прыведзены цытаты вышэй, Ян Павел ІІ, — думаў як пра Пятра, так і пра ўсю рэальнасць службовага святарства, імкнучыся падкрэсліць глыбіню значэння гэтай літургічнай прастрацыі. У такой паставе ляжання крыжам перад атрыманнем пасвячэння выяўляецца найглыбейшы сэнс святарскай духоўнасці: так, як Пётр, прыняць ва ўласным жыцці Крыж Хрыста і стаць “падлогаю” для братоў».

У гэтым годзе ў Каталіцкім Касцёле ў Беларусі сем дыяканаў атрымалі прэзбітэрскае пасвячэнне і дзевяць семінарыстаў сталі дыяканамі.

Вясна:

11 красавіка — брат Уладзімір Лапацкі OCist атрымаў дыяканскае пасвячэнне.

У гэты ж дзень прэзбітэрскае пасвячэнне атрымаў дыякан Рамуальд Сяргей Касматовіч, францішканін.

Лета:

3 чэрвеня дыякан Чэслаў Ладыка прыняў прэзбітэрскае пасвячэнне.
27 чэрвеня прэзбітэрамі сталі навучэнцы Вышэйшай духоўнай семінарыі ў Гродне:

• дыякан Дзмітрый Папенюк з парафіі Унебаўзяцця Найсвяцейшай Панны Марыі ў Дзярэчыне,
• дыякан Юрый Садоўскі з парафіі Адшукання Святога Крыжа ў Астраўцы,
• дыякан Віталій Пяткевіч з парафіі Святога Міхала Арханёла ў Ашмянах.

Восень:

12 верасня дыякан Ігар Мутрук атрымаў прэзбітэрскае пасвячэнне.

10 кастрычніка брат Павел Яштэль з Таварыства Каталіцкага Апостальства (палатыны) атрымаў дыяканскае пасвячэнне.

25 кастрычніка адбылося дыяканскае пасвячэнне Паўла Трона.

31 кастрычніка дыяканскае пасвячэнне атрымалі семінарысты Раман Страшко і Аўгуст Калясінскі.

21 лістапада прэзбітэрскае пасвячэнне атрымаў дыякан Алег Яновіч, дыяканамі сталі тры семінарысты:

• Дзяніс Бразінскі,
• Андрэй Ганчар,
• Андрэй Скамарошка.

28 лістапада адбылося дыяканскае пасвячэнне Паўла Федаровіча MIC, які належыць да супольнасці айцоў марыянаў.

(AYU)