Увечары 4 кастрычніка, напярэдадні распачацця ІІІ Надзвычайнай сесіі Сіноду Біскупаў, прысвечанай сужэнству і сям’і ў кантэксце новай евангелізацыі, на плошчы св. Пятра ў Ватыкане адбылося малітоўнае чуванне ў інтэнцыі Сіноду. У працах Сіноду прыме ўдзел Мітрапаліт Мінска-Магілёўскі арцыбіскуп Тадэвуш Кандрусевіч.

Як паведамляе спецыяльны карэспандэнт Catholic.by у Рыме, у чуванні ўдзельнічала каля 50 тысяч чалавек. Яно было ўзбагачана сведчаннямі маладой пары, якая рыхтуецца да шлюбу, сям’і, якая мае чацвёра дзяцей і ўсынавіла пакінутае дзіця, і сям’і, якая пасля шасці гадоў сепарацыі зноў жыве разам.

Папа Францішак у сваёй прамове прасіў аб трох дарах Духа Святога для іерархаў, якія прымуць удзел у Сінодзе: аб слуханні Бога і Яго народу, адкрытасці на шырокую і братэрскую канфрантацыю і пастаянным позірку на Езуса. Пантыфік адзначыў, што, каб адкрыць тое, чаго Хрыстус просіць у свайго Касцёла, неабходна прыслухацца да пульсу нашых часоў і адчуць «пах» сучаснага чалавека, каб зразумець яго радасці і надзеі, смутак і трывогу, бо толькі тады будзе магчымым абвяшчаць Евангелле сям’і.

(DN)