8 верасня Каталіцкі Касцёл адзначае свята Нараджэння Найсвяцейшай Панны Марыі. Шматлікія касцёлы ў Беларусі маюць тытул Нараджэння Панны Марыі, сярод іх святыні ў Заслаўі, Барысаве, санктуарый у Браславе. З нагоды свята ў гэтых святынях адбудуцца адпустовыя набажэнствы.

Гэтае свята нагадвае пра  тое, што Маці Божая была пазбаўлена першароднага граху, з якім нараджаецца кожны чалавек. Гэтым самым Бог рыхтаваў Найсвяцейшую Панну да таго, каб яна стала Маці Езуса Хрыста.

Сваім незвычайным Нараджэннем яна ні ў якім разе не аддаляецца ад чалавека і не пагарджае ім. Найсвяцейшая Панна адначасова з’яўляецца і нашай Маці, а таму свята яе Нараджэння павінна быць для верніка настолькі асабістай і блізкай падзеяй, як дзень нараджэння яго ўласнай маці.