Апостальскі Нунцый у Беларусі арцыбіскуп Клаўдыё Гуджэроцці накіраваў да ўдзельнікаў ХХ грэка-каталіцкай пілігрымкі «Віцебск – Полацк» сардэчныя пажаданні і арцыпастырскае благаслаўленне.

Зыходзячы з дэвізу пілігрымкі: «Будзьце мужнымі! Адвагі!» — арцыбіскуп павіншаваў удзельнікаў з іх адвагай прыняць фізічны і духоўны подзвіг пілігрымавання, малітвы і посту, а таксама супольнага абмеркавання і асэнсавання розных аспектаў жыцця хрысціяніна.

«Вы будзеце разважаць над адвагай веры, надзеі, любові. Будзеце гаварыць пра адвагу малітвы і практычнага служэння бліжняму. Жадаю вам мужнасці і адвагі на шляху пілігрымкі і на шляху ўсяго вашага жыцця. Жадаю вам радаснай надзеі! І суправаджаю вас маімі малітвамі і благаслаўленнем у Імя Пана. Мужна і адважна ідзіце ў радаснай надзеі!» — сказаў іерарх.

Гэтыя віншаванні Апостальскага Нунцыя, а таксама яго пастырскае благаслаўленне перадаў пілігрымам Апостальскі візітатар для грэка-католікаў Беларусі архімандрыт Сяргей Гаек на першым прыпынку пілігрымкі, пры крыжах, што стаяць на выездзе з Віцебска.