Пры грэка-каталіцкай парафіі ў Полацку прайшоў летнік для людзей з асаблівасцямі псіха-фізічнага развіцця |
Грэка-Каталіцкая Царква
|
25.07.2014 15:09 |
У Полацку пры грэка-каталіцкай парафіі Святамучаніка Язафата з 14 па 20 ліпеня 2014 г. прайшоў летнік для людзей з асаблівасцямі псіха-фізічнага развіцця. Летнік быў арганізаваны Хрысціянскім валанцёрскім рухам св. Мікалая.
Праграма была цікавай і разнастайнай. Акрамя штодзённай Боскай Літургіі ў мясцовай грэка-каталіцкай царкве св. Параскевы Полацкай і супольных малітваў, моладзь мела магчымасць прыняць удзел у забаўляльных мерапрыемствах, у тым ліку паходзе на возера, рэчку, экскурсіі па горадзе, а таксама ў вывучэнні Бібліі праз тэатральныя пастановы.
У гэтым годзе дзякуючы мясцоваму коннаму клубу ўдзельнікі летніка маглі пакатацца на конях у рамках занятку па іпатэрапіі. Ім цікава было даведацца і пра тое, што коні могуць пражыць 40 гадоў, але тыя коні, якія задзейнічаны ў іпатэрапіі, жывуць толькі 5 гадоў, ахвяруючы сваё здароўе і жыццёвыя сілы людзям.
Полацкія летнікі традыцыйна служаць пляцоўкай для сустрэчы і духоўнага ўзрастання саміх валанцёраў. Гэта час, калі можна сабе дазволіць выйсці за межы сваіх штодзённых клопатаў, спыніцца і пражыць тыдзень у хрысціянскай супольнасці, практыкуючы веру ў служэнні бліжняму.
Паводле svjazep.org
(AG) Больш фота на svjazep.org
|