У рамках міжнароднай платформы супрацоўніцтва і душпастырскай дапамогі Усходнім Цэрквам «Synergeia pro Oriente Christiano» працягвае працу студыйная група, якая займаецца вывучэннем практычнага прымянення дакументаў Другога Ватыканскага Сабору ў жыцці Усходніх Каталіцкіх Цэркваў Еўропы.

На душпастырскім семінары 15 лютага, які прайшоў у г. Бары (Італія) і ў якім удзельнічалі таксама сябры экуменічнай «Супольнасці Ісуса» (Comunita’ di Gesu’) былі абмеркаваны дэкрэты «Аб Усходніх Каталіцкіх Цэрквах» (Orientalium Ecclesiarum), «Аб экуменізме» (Unitatis redintegratio) і дэкларацыя «Аб адносінах Царквы да нехрысціянскіх рэлігій» (Nostra aetate). Працамі семінара кіравалі езуіцкі багаслоў а. д-р Карла Калона і Апостальскі візітатар для грэка-католікаў Беларусі архімандрыт д-р Сяргей Гаек.

У працы міжнароднай навуковай групы ўдзельнічае ліцэнцыят багаслоўя а. Андрэй Крот, грэка-каталіцкі душпастыр у Гродне. Апрацаваная ім біяграфія Слугі Божага архімандрыта Фабіяна Абрантовіча (1884-1946) была абмеркавана ўдзельнікамі ў кантэксце беларускіх прэкурсораў Другога Ватыканскага Сабору.

Семінар, які пачаўся малітвай пры парэштках св. Мікалая Цудатворцы, стаў добрай нагодай, каб узгадаць 25 гадоў адкрытай душпастырскай дзейнасці парафій Грэка-Каталіцкай Царквы ў Беларусі. Удзельнікі семінарa з зацікаўленасцю прынялі інфармацыю аб удзеле беларускіх грэка-каталіцкіх душпастыраў і вернікаў у розных міжканфесійных і міжрэлігійных мерапрыемствах, накіраваных на практычнае прымяненне дакументаў Другога Ватыканскага Сабору.

Паводле svjazep.org

(AG)