392-годдзе з дня мучаніцкай смерці св. Язафата, арцыбіскупа Полацкага – 12 лістапада – з’яўляецца парафіяльным святам для грэка-каталіцкай парафіі ў Полацку. Сёлета святкаванне адбывалася 8 лістапада.

Пачалося святкаванне, як звычайна, напярэдадні вячэрняй з ліццяй. У гэтым годзе ўзначаліў яе архімандрыт Сяргей Гаек, Апостальскі візітатар для грэка-католікаў Беларусі, у саслужэнні настаяцеля парафіі а. Аляксандра Шаўцова.

У суботу на вячэрні, а таксама ў нядзелю па ютрані і Боскай Літургіі спяваў міжпарафіяльны хор «Прасфара» з Мінска.

Боскую Літургію 8 лістапада ўзначаліў архімандрыт Сяргей Гаек у саслужэнні а. Аляксандра Шаўцова і дыякана Аляксея Варанко.

Пасля Літургіі прывітальныя словы да ўдзельнікаў скіравалі архімандрыт Сяргей Гаек, а. Аляксандр Шаўцоў, вернікі Арцём Сітнікаў з Івацэвічаў (ад Заходняга дэканату БГКЦ) і Багдан Сунак з Віцебска (ад Усходняга дэканату БГКЦ).  

Затым у ніжняй царкоўнай зале адбылася святочная братэрская агапа, падрыхтаваная вернікамі парафіі, падчас якой парафіяне і госці маглі паглядзець выставу прац мастакоў з духоўнага пленеру, які адбыўся ў полацкай парафіі ў жніўні і быў прысвечаны мастаку Яну Хруцкаму, сыну ўніяцкага святара.

Пасля пачастунку хор «Прасфара» і Арцём Сітнікаў зладзілі невялікі сяброўскі канцэрт народных і бардаўскіх спеваў.

(MV)