27 красавіка, у дзень кананізацыі Яна Паўла ІІ, у катэдральны касцёл св. Францішка Ксаверыя ў Гродне прывезлі парэшткі святога, а ў суботу вечарам усталявалі яго скульптуру. Некалькі кропель крыві Папы на тканіне даставілі з Кракава ў рэліквіярыі, які па форме нагадвае сонца.

Пасля ўрачыстай Імшы, якую ўзначаліў пробашч катэдральнай парафіі ксёндз Ян Кучынскі, вернікі мелі магчымасць дакрануцца да рэліквіярыя. Ён будзе захоўвацца ў празрыстым сейфе каля алтара Маці Божай Ружанцовай (першы справа ад галоўнага алтара, калі стаяць да яго тварам).

Над гіпсавай скульптурай Яна Паўла ІІ, вышыня якой 237 сантыметраў, пяць месяцаў працавалі скульптар і жывапісец Васіль Мартынчук разам з памочнікам Міхаілам Латышавым і сынам Арсеніем.

“Гэта мая першая сур’ёзная праца, - гаворыць Васіль Мартынчук. - Я і не мог падумаць, што буду рабіць нешта для фарнага касцёла. Я і дагутэль не магу паверыць, што зрабіў гэта. Мне дапамагалі анёлы”.
Майстар паходзіць з Украіны, але доўгі час жыве ў Гродне. Ксёндз Ян Кучынскі расказаў, што перад працай скульптар папрасіў аб благаслаўленні, кажучы, што сам не зможа стварыць фігуру.

Падчас Імшы вернікам нагадалі пра цуд, які адкрыў шлях да кананізацыі Яна Паўла ІІ.

Паводле vgr.by

(AG)

Фота vgr.by