Ва ўспамін св. Дамініка Савіо вернікі дзятлаўскай парафіі Унебаўзяцця Найсвяцейшай Панны Марыі сабраліся, каб ушанаваць гэтага святога юнака.

Падчас урачыстай Імшы кс. Алег Жураўскі SDB у гаміліі закрануў некаторыя моманты з жыцця пятнаццацігадовага святога. “Кожны чалавек ставіць у сваім жыцці нейкія мэты: стаць інжынерам, удасканаліць свой фізічны стан, палепшыць вынікі ў школе і г.д. Дамінік у такім маладым узросце паставіў перад сабой самую дасканалую мэту – стаць святым. Да гэтай мэты ён дайшоў пераможцам”, - адзначыў святар. Таксама прагучалі словы, што чалавек не павінен баяцца цяжкасцяў, якія ўзнікаюць у выніку рэалізацыі жыццёвых мэтаў; павінен болей дбаць не аб тым, кім будзе на зямлі, але аб тым, кім будзе ў небе, і што святы Дамінік зразумеў гэта дасканала.

Падчас Імшы міністранты дзятлаўскай парафіі аднавілі перад Богам і ўсімі прысутнымі свае абяцанні: быць вернымі міністранцкаму пакліканню, а таксама пабожна і радасна выконваць абавязкі, звязаныя з гэтым служэннем.

Напрыканцы літургіі ўдзельнікі свята памаліліся Літаніяй да Дамініка Савіо, просячы яго заступніцтва ў імкненні да святасці.

Паводле sdb.by

(AG)