Падчас Імшы ў гонар святога Дамініка Савіо 6 мая ўдзельнікі Савіо-клуба ў Смаргоні ўрачыста аднавілі абяцанні, якія ўпершыню прынеслі год таму. Просячы заступніцтва святога Дамініка, яны прысягнулі жыць у еднасці з Езусам і Марыяй, пабожна ўдзельнічаць у Імшах, адказна выконваць свае абавязкі, з любоўю і павагай адносіцца да кожнага чалавека.

У гаміліі падчас Імшы кс. Іван Огар SDB расказаў пра цуды, якія можа стварыць Бог у жыцці, калі адкрыць сэрца на Яго слова, а таксама ўспомніў пра асобу маладога святога. У звароце да хлопцаў і дзяўчат святар падкрэсліў: “Нягледзячы на тое, што Дамініка Савіо многія лічаць “салодкім” святым, ён з’яўляецца прыкладам сілы, мужнасці, нецярпімасці да граху”. Таксама, па словах святара, нельга змарнаваць ні хвіліны часу ў імкненні да святасці і кожны чалавек заўсёды павінен быць гатовым стаць перад Нябесным Айцом.

Павіншаваць моладзь з гэтай падзеяй прыехаў Інспектарыяльны дэлегат кс. Віктар Гайдукевіч SDB. Хлопцы і дзяўчаты распавялі яму пра Савіо-клуб. Ксёндз Віктар Гайдукевіч пажадаў ім падчас летняга адпачынку не развітвацца з Богам, а наадварот, удзяляць Яму як мага больш часу, памятаць пра Нябеснага Айца падчас паездак, гульняў, сустрэч з сябрамі.

Паводле sdb.by

(AG)