13 чэрвеня, ва ўспамін св. Антонія Падуанскага, святара і доктара Касцёла, у парафіі ў Струбніцы (Гродзенская дыяцэзія, Мастоўскі дэканат) прайшла парафіяльная ўрачыстасць. Імшу ўзначаліў кс. Ян Кучынскі, на ўрачыстасць прыбылі вернікі з розных парафій, шмат семінарыстаў і святароў з розных куткоў дыяцэзіі.

Ксёндз Ян Кучынскі падчас Імшы падкрэсліў неабходнасць малітвы аб нашай будучыні праз заступніцтва святога Антонія. Айцец Валерый Мазюк у гаміліі разважаў пра тры адметныя рысы святога: ён быў вялікім прапаведнікам, апекаваўся беднымі, дапамагае пры пошуку згубленых рэчаў. Па словах святара, варта прасіць аб заступніцтве святога ў выпадку не толькі згубленых рэчаў, але і ў выпадку знішчэння веры. Айцец Валерый Мазюк заклікаў вернікаў да аднаўлення дыялогу з Богам праз малітву, дапамогу бедным, чытання Святога Пісання, а таксама прывёў словы св. Яна Паўла ІІ: “Мы павінны жыць Хрыстом і любіць Яго так, каб у нас пыталіся аб Ім”.

Падчас Імшы спяваў хор разам з арганісткай з Ваўкавыска пані Ірэнай.

Імша завяршылася ўрачыстай працэсіяй. Таксама вернікі разам памаліліся Літаніяй да Найсвяцейшага Сэрца Езуса.

На наступны дзень, 14 чэрвеня, дапаможны біскуп Гродзенскай дыяцэзіі Юзаф Станеўскі ўдзяліў групе вернікаў гэтай парафіі сакрамэнт канфірмацыі. У гаміліі іерарх заахвоціў тых, хто прыняў сакрамэнт, змяняць свет мовай Евангелля, каб людзі па іх мове і ўчынкам распазнавалі ў іх хрысціян.

Яна Жадзейка, AG