Вельмі прыемна, што духоўную радасць святочнага дня вернікаў касцёла святых апосталаў Пятра і Паўла ў Іўі раздзяляюць госці: святары з усяго Іўеўскага дэканата і з суседняга Навагрудка, а таксама госці з Літвы, Германіі, Польшчы і Расіі. 

 

Святую Імшу ўзначаліў дырэктар Душпастырскага цэнтра пры Канферэнцыі Каталіцкіх Біскупаў Беларусі кс. Эдмунд Друз SChr.

У сваёй гаміліі святар узгадаў святых апосталаў Пятра і Паўла і іх жыццёвыя дарогі. Ксёндз Эдмунд звярнуў увагу на тое, што дзякуючы апостальскай працы Пятра і Паўла шмат людзей знайшло дарогу да Праўды, якой з’яўляецца Езус. Святар заахвоціў вернікаў шукаць сваю дарогу да Бога, каб быць моцнымі ў веры, прыклад якой пакінулі апосталы.

 

«Беларуская зямля нарадзіла шмат мучанікаў за веру – тых, хто аддаў сваё жыццё ў абароне крыжа. Таму нам варта і сёння быць адважнымі хрысціянамі, якія будуць бараніць Касцёл па прыкладу сваіх продкаў», -- зазначыў святар.