У Тракелі ідзе пілігрымка з Іўеўскага дэканата, яе ўзначальвае кс. Ян Гавецкі. Ужо 16-я па ліку пілігрымка аб'ядноўвае вернікаў з розных парафій дэканата, якія ідуць з агульнай інтэнцыяй — падзякі за кананізацыю Яна Паўла ІІ.

Ідуць да дому Маці, якая ўжо даўно выбрала для сябе святое месца ў Тракелях. Там асабліва можна адчуць прысутнасць Бога, там — як дома.

Традыцыяй трэба таксама назваць і пешую пілігрымку Іўеўскага дэканата. У гэтым годзе ўжо ў 16-ы раз вырушыла пілігрымка гэтага дэканата.

Гэтая пілігрымка незвычайная па некалькіх прычынах. Яна выключная тым, што ў ёй ідуць адметныя людзі, бо проста няма падобных людзей: кожны прыносіць штосьці сваё, узаемна ўзбагачаючыся ад іншых. Выключная, бо з самага пачатку арганізавана ксяндзом Янам Гавецкім — дэканам Іўя, які кожны год, ідучы першым, дае прыклад моладзевага запалу. Выключная, бо закранае ўсе парафіі дэканату, збіраючы пілігрымаў з кожнай парафіяльнай супольнасці, дзе ўсе становяцца адным. Па дарозе пілігрымы ўдзельнічаюць у канферэнцыях, Імшах, дзеляцца сведчаннем свайго жыцця, наведваюць вёскі, мясцовасці, дзе таксама дзеляцца сведчаннем, даючы добры прыклад, але найперш нясуць радасць - аснову кожнай пілігрымкі. Без радасці не будзе аніякай атмасферы. Без радасці ніхто не адолее аніводнага кіламетра. Радасць дазваляе чалавеку ісці наперад, ісці з адвагай…

Атмасферу радаснага крочання мне было дадзена адчуць 9 ліпеня, калі я далучыўся да гэтай пілігрымкі. Нягледзячы на тое, што надвор’е ў той дзень было вельмі зменлівае, бо то дождж ішоў, то свяціла спякотнае сонца, якое цёплымі прамянямі дакраналася да ўсіх, так што папярэдне змочанае адзенне зноў станавілася сухім.

Але ж колькі радасці ў людзей, якія выходзяць на дарогу, каб спаткацца з пілігрымамі! Радуюцца як дзеці, калі пілігрымы даюць ім памятны абразок з выяваю св. Яна Паўла ІІ. Гэтая пілігрымка з’яўляецца падзякаю Іўеўскага дэканата за дар кананізацыі Вялікага Папы. Таму таксама падчас пілігрымкі разважаюць над вучэннем Яна Паўла ІІ, каб аніводнае слова, якое ён накіроўваў да моладзі, не было згублена.

У пілігрымцы перадусім ідзе моладзь і дзеці, якіх душпастыры заахвоцілі прыняць удзел у рэлігійнай сустрэчы, якая развівае, узбагачае і ўмацоўвае веру. Лічба пілігрымаў стала большай за 160 чалавек, але, як адзначаюць арганізатары, будзе яшчэ большай, бо ўвесь час далучаюцца новыя ўдзельнікі.

Самым малодшым удзельнікам пілігрымкі з’яўляецца Аўрымас, якому 1 год і 7 месяцаў. Як высветлілася, хлопчык у пілігрымку ідзе трэці раз. Як такое можа быць?

Першы раз дзіця ішло, калі ішла яго маці, якая была цяжарная. Другі раз - год назад, калі хлопчыку было 7 месяцаў. І сёлета ён ідзе ў трэці раз. За ўсю дарогу ён самастойна праходзіць некалькі сотняў метраў. 

Кс. Юрый Марціновіч, (AYU)