Прывітанне з Вострай Брамы прывезлі ўдзельнікам урачыстасцяў у Тракелях літоўскія вернікі |
Беларусь - Гродзенская дыяцэзія
|
12.07.2014 19:19 |
11-12 ліпеня ў дыяцэзіяльным санктуарыі Маці Божай Каралевы сем’яў у Тракелях адбыліся адпустовыя ўрачыстасці. Акрамя тысяч пілігрымаў з розных месцаў Беларусі, на ўрачыстасцях прысутнічала вялікая група вернікаў братняга літоўскага народа.
У Тракелі індывідуальна прыбылі пілігрымы з розных мясцовасцяў Літвы. Гродзенская дыяцэзія была вылучана ў 1991 г. з Віленскай архідыяцэзіі, якой Касцёл на Гродзеншчыне абавязаны многімі традыцыямі і звычаямі.
У Тракелях прысутнічала таксама арганізаваная група пілігрымаў з Віленшчыны, якія прыбылі пакланіцца Маці Божай у тракельскім абразе і прывезлі біскупу Гродзенскаму Аляксандру Кашкевічу і ўсім удзельнікам урачыстасцяў прывітанне з Вострай Брамы.
З 1981 г. сённяшні гродзенскі ардынарый быў пробашчам парафіі Святога Духа ў Вільні да таго, як 13 красавіка 1991 г. Святы Айцец прызначыў яго біскупам новаўтворанай Гродзенскай дыяцэзіі.
Пілігрымы з Літвы засталіся пад вялікім уражаннем ад урачыстасцяў у Тракелях. Па іх словах, беларускі народ настолькі загартаваны ў веры, што нават нягледзячы на не вельмі добрае надвор’е, многія прыбылі да Маці Божай у санктуарый і вытрывалі да канца.
Паля завяршэння ўрачыстасцяў з літоўскімі пілігрымамі сустрэўся біскуп Аляксандр Кашкевіч. Іерарх падзякаваў ім за прыгожую ініцыятыву прыбыцця, запрасіў удзельнічаць у тракельскіх урачыстасцях кожны год і распавядаць іншым пра тое, што яны перажылі ў гэтыя дні ў санктуарыі. На заканчэнне сустрэчы біскуп удзяліў літоўскім вернікам пастырскае благаслаўленне і паабяцаў заўсёды маліцца за Касцёл на Віленшчыне. (JM)
|
Фотарэпартаж |