З 14 па 25 ліпеня ў Смаргоні ў парафіі Св. Міхала Арханёла праходзіў лагер для дзяцей з 6 да 14 гадоў “Вакацыі з Богам”. На працягу дзесяці дзён 95 дзяцей разам з 20 аніматарамі i дапаможнікамі, кс. Станіславам Краўчанкам SDB, с. Веранікай Блізнюк FMA і семінарыстам Алегам Каралёвым SDB разважалі над жыццём маленькага салезіянскага святога Дамініка Савіо. Дэвізам лагера былі словы “Да неба разам са св. Дамінікам Савіо”.

Па прыкладу гэтага святога дзеці імкнуліся рабіць маленькія крокі да святасці падчас штодзённай Імшы, танцаў, працы ў групах, гульняў.

За дні адпачынку кожнае дзіця магло наведаць два гурткі на выбар: танцы, арыгамі, беларускія сувеніры, домікі з запалак, вазы з бутэлек і шмат іншага. Праграма прадугледжвала выезд у Залессе ў памесце Міхала Клеафаса Агінскага і выезд на прыроду, дзе дзяцей чакаў Місійны дзень. Хлопцы і дзяўчаты цешыліся магчымасці самім прыдумаць атрыбутыку і традыцыі свайго племені, а таксама пабудаваць шалаш і прадставіць танец.

У апошні дзень – Дзень удзячнасці – дзяцей і іх бацькоў чакаў развітальны канцэрт, на якім былі падзведзены вынікі лагеру і прагучалі словы падзякі.

Паводле sdb.by

(AG)