15 жніўня 2014 г. у парафіі Унебаўзяцця Найсвяцейшай Панны Марыі ў Дзятлаве адбылася адпустовая ўрачыстасць, якая аб’яднала шматлікіх вернікаў і запрошаных святароў. Таксама ў гэты дзень парафіяне развітваліся са сваім пробашчам кс. Алегам Жураўскім SDB, які па загаду настаяцеляў скіроўваецца ў Смаргонь.

За тры з паловай гады працы ў Дзятлаве кс. Алег Жураўскі дапамог з аднаўленнем знешняга аблічча святыні, абвяшчаў Божае слова, накіроўваючы парафіянаў на шлях Хрыстовай любові і дапамагаючы адчуць Божую прысутнасць. Разам са сваім пробашчам вернікі Дзятлава змаглі яднацца ў малітве падчас перэгрынацый рэліквій св. Тэрэзы ад Дзіцятка Езус і заснавальніка супольнасці салезіянаў св. Яна Боско.

У гаміліі кс. Алег Жураўскі закрануў шлях дзеяння Марыі ў біблійных сюжэтах, звярнуў увагу на адметную духоўную рысу Маці Божай: пакору і звычайны стыль жыцця святой дзяўчыны з Назарэта.

Пасля Імшы адбылася святочная працэсія, затым прагучалі падзякі пробашчу. Хвалюючым момантам стаў падарунак-верш, прысвечаны кс. Алегу Жураўскаму. Напрыканцы вернікі праспявалі песню ўдзячнасці.

Паводле sdb.by

(AG)