3 лістапада ў дыяцэзіяльным санктуарыі Маці Божай Каралевы сем’яў у Тракелях распачаліся рэкалекцыі для пяці дыяканаў — выпускнікоў Вышэйшай духоўнай семінарыі ў Гродне — перад атрыманнем прэзбітэрскага пасвячэння.

Падчас рэкалекцый шмат часу ўдзельнікі маюць на асабістую малітву і размову з Богам. Рэкалекцыяніст заахвоціў дыяканаў да захавання цішыні падчас духоўных практыкаванняў, каб добра пачуць голас Бога.

У першы дзень рэкалекцый з дыяканамі сустрэўся біскуп Гродзенскі Аляксандр Кашкевіч. Біскуп паразмаўляў з кожным і пажадаў усім, каб гэты час быў напоўнены малітвай і адкрыццем на дары Святога Духа.

Рэкалекцыі, якія праводзіў кс. Здзіслаў Ведэр SDB, дэкан Смаргонскі, будуць праходзіць да 7 лістапада. 8 лістапада ў гродзенскай катэдры біскуп Аляксандр Кашкевіч удзеліць дыяканам прэзбітэрскае пасвячэнне, а на наступны дзень новапрэзбітэры ўзначаляць святую Імшу кожны ў сваёй роднай парафіі.

Заахвочваем да малітоўнай падтрымкі дыяканаў падчас рэкалекцый, каб маглі лепш падрыхтавацца да прэзбітэрскага пасвячэння і быць у будучыні годнымі святарамі.