17 снежня з нагоды набліжэння святаў Божага Нараджэння група навучэнцаў Вышэйшай духоўнай семінарыі ў Гродне на чале з духоўным айцом кс. Валерыем Быкоўскім наведала Васілішкаўскі дом-інтэрнат, каб падзяліцца радасцю перажывання Калядаў з дзецьмі, якія ў ім пражываюць.

У гэтым доме-інтэрнаце ў вёсцы Галавічполле знаходзяцца дзеці з асаблівасцямі псіхафізічнага развіцця. Семінарысты чакалі, што іх сэрцы будуць напоўнены жалем і болем з-за ўбачанага, але, пераступіўшы парог гэтага месца, яны апынуліся ў цёплай, хатняй атмасферы. Па радасці і ўсмешках на тварах дзяцей, якія іх сустрэлі, можна было ўбачыць, што тыя з нецярплівасцю чакалі прыезду гасцей. Дзеці падрыхтавалі для іх тэатральную пастаноўку аб Божым Нараджэнні.

На пачатку семінарысты пазнаёміліся з дзецьмі і падзяліліся аплаткай, нагадваючы адзін аднаму аб айцоўскай любові Бога да кожнага. Таксама яны расказалі хлопчыкам і дзяўчынкам аб Божым Нараджэнні, якое змяніла жыццё кожнага чалавека. Cупольны спеў калядак з музычнай групай “AVE” даў магчымасць адчуць дух сямейнага перажывання Божага Нараджэння, а дзяленне аплаткай і салодкі стол нагадалі сямейную атмасферу вігілійнага вечара.

Сапраўдны дух сям’і адчуваўся падчас сустрэчы дзякуючы дырэктару дома-інтэрната Генадзю Генрыхавічу і яго намесніку Святлане Вацлаваўне, а таксама выхавацелям, якія вельмі клапоцяцца аб тым, каб дзеці адчувалі цеплыню бацькоўскага дому.

Паводле сайта Вышэйшай духоўнай семінарыі ў Гродне

(AG)