Ва ўрачыстасць Аб’яўлення Пана дапаможны біскуп Гродзенскай дыяцэзіі Юзаф Станеўскі разам з капеланам абласнога шпіталя ў Гродне кс. Алегам Кудэркам маліўся за медперсанал і хворых шпіталя.

У гаміліі падчас святой Імшы іерарх адзначыў: “Ва ўрачыстасць Аб’яўлення Пана мы зноў чуем пытанне: “Дзе нованароджаны Кароль?” Тады жыхароў Ерузалема пыталіся мудрацы з Усходу. Сёння з падобным пытаннем звяртаецца чалавек, які шукае праўды і справядлівасці, супакою і любові  - шукае сэнс жыцця”.

“Менавіта з гэтым пытаннем людзі звяртаюцца да нас, таму што яны бачылі, як мы ішлі да бэтлеемскіх ясляў і нахіляліся з Сям’ёй з Назарэта над калыскай, дзе ляжыць Дзіцятка Езус, - падкрэсліў біскуп. - Свет назіраў і бачыў радасць у нашых сэрцах і яснасць розуму ў разважанні над таямніцай Божага Нараджэння. Мы адказваем: “Гэта нельга ўтаіць””.

Іерарх звярнуў увагу, што “рознымі шляхамі можна дайсці да Езуса, розныя сцежкі вядуць да Яго”: “Некаторыя - як пастухі - толькі зышлі з гары да горада Бэтлеема, каб пакланіцца Езусу. Іншыя - як Тры Каралі - павінны былі прайсці доўгі шлях, каб нарэшце сустрэцца з Езусам, пакланіцца Дзіцяці і прапанаваць Яму свае дары”.

“Пра намаганні і мужнасць гэтых мудрацоў разважаем сёння і захапляемся імі, - дадаў біскуп. - Ці можна шкадаваць аб пройдзеным шляху, пражытых гадах, калі ў канцы чакае Бог? Гледзячы на падарожжа Мудрацоў, мы бачым таксама цяжкасці і перашкоды, якія ўзнікаюць на іх шляху. Ад іх вучымся пераадольваць і перамагаць гэтыя цяжкасці, каб служыць парадай іншым, каб ішлі на сустрэчу з Хрыстом”.

“У кожнага з нас ёсць моманты, калі мы не хочам ісці далей, калі падаем ад стомленасці, калі прыходзіць спакуса вярнуцца назад ці, па меншай меры, застацца ў тым месцы, дзе знаходзімся цяпер. Гэтым момантам можа быць цяжкая хвароба, самотнасць або калецтва. У такія хвіліны давайце паглядзім на доўгі шлях Мудрацоў, - заахвоціў біскуп. - Яны не стаміліся ў дарозе, таму што шукалі поўню праўды, праўдзівую крыніцу мудрасці. Сёння яны з’яўляюцца прыкладам для нас, каб мы паглыблялі нашую веру, каб былі людзьмі надзеі і даверу, каб знайшлі ў Хрысце поўны сэнс і мэту свайго жыцця”.
 

Біскуп Юзаф Станеўскі пажадаў усім сабраным, каб “не стаміліся ісці дарогай Пана, а сустрэўшы Яго і разпазнаўшы, прынялі ў свае сэрцы і іншай дарогай і іншым чалавекам вярталіся дадому – чалавекам, напоўненым любоўю і Божай ласкай, а таксама моцным здароўем”. 

(AG)