10 студзеня ў салезіянскім араторыі ў Смаргоні 9 чалавек склалі свае першыя абяцанні перад Богам як кандыдаты ў аніматары.

Да таго, каб стаць кандыдатам у аніматары, моладзь рыхтуецца паўтара гады.

Аніматар – ад лац. аnima – душа і «матор» – запальваць – "той, які ажыўляе душу". Гульні на пляжы, вясёлыя мерапрыемствы ў навучальных установах і правядзенне гарадскіх святаў не могуць абысціся без іх.

У салезіянскіх араторыях усяго свету, таксама і ў Беларусі, працуюць аніматары ў харызмаце св. Яна Боско. Галоўная мэта гэтага служэння - прывесці моладзь да Бога праз асабісты прыклад, пастаянную прысутнасць сярод дзяцей і моладзі, евангелізацыю і сапраўдную хрысціянскую радасць.

Салезіянскі аніматар – гэта чалавек дзеяння, які не сядзіць на месцы, ідзе наперад і вядзе за сабою іншых, якога адразу бачна, бо ён запальвае духам радасці тых, хто знаходзіцца побач. Гэта ў першую чаргу той, які жыве разам з Богам, давярае Яму ўсе свае праблемы і перажыванні, даручае Яму моладзь і дзяцей, якіх сустракае. Гэта таксама чалавек, які шчыра дзеліцца з іншымі сваімі талентамі, асабістым часам і багатым духоўным жыццём, заўсёды знаходзіцца сярод дзяцей і моладзі, каб на справе рэалізаваць прэвентыўную сістэму кс. Боско, гэта значыць не дапусціць ніякага граху і стварыць атмасферу дабра і радасці.