Салезіянская моладзь правяла конкурс «Сэлфі з ксяндзом Боско»

Беларусь - Гродзенская дыяцэзія

03.02.2015 11:57

З 9 па 31 студзеня араторый імя святога Яна Боска ў Смаргоні праводзіў  конкурс «Сэлфі з ксяндзом Боско». Удзельнічаць у спаборніцтве магла моладзь не толькі з салезіянскіх араторыяў, але і з іншых куткоў нашай краіны. Для іх конкурс стаў магчымасцю пазнаёміцца з гэтым святым. Усе ўдзельнікі павінны былі выканаць простыя ўмовы конкурса: 1.Прыдумаць і зрабіць арыгінальны фотаздымак у стылі «сэлфі», каб на ім прысутнічаў ксёндз Боско. 2.Адправіць фота ў сацыяльную сетку «Вконтакте» і пад ім напісаць сваё імя (http://vk.com/selfidonbosco). 3.Чакаць, пакуль фота атрымае перамогу. Прагаласаваць за любы фотаздымак можна было, націснуўшы знак «Мне падабаецца». Перамагло фота, якое набрала найбольш упадабанняў. У конкурсе прымалі ўдзел не толькі з Беларусі, але і з іншых краін. Сваімі сэлфі парадаваў семінарыст Марк Найдзіч SDB, які вучыцца ў Славакіі. У баку не засталіся святары, сёстры і семінарысты, якія таксама далучыліся да конкурса. Перамогу атрымала Валерыя Шорац з араторыя ў Смаргоні. «Сёння вечарам адбылася зусім неспадзяваная сустрэча» — менавіта так Валерыя назвала сваё фота. «Галоўнай ідэяй сэлфі, — кажа Валерыя, — было паказаць, што дух ксяндза Боско жыве ў нашым араторыі». Узнагароджванне пераможцаў адбылося 1 лютага на свяце св. Яна Боска ў Смаргоні. Як адзначаюць арганізатары, уражанні ад конкурсу засталіся толькі пазітыўныя, таму конкурс плануецца правесці і ў наступным годзе. Паводле sdb.by, (AYU)