У смаргонскім араторыі 1 сакавіка адбыўся вечар з нагоды святкавання Дня абаронцы Айчыны і Міжнароднага дня жанчын пад назваю «23+8».

Пра гэта паведамляецца на sdb.by.

Вечар распачаўся святой Імшой, пасля якой адбыўся Крыжовы шлях, падрыхтаваны моладдзю. Падчас гэтай малітвы прысутныя маглі паразважаць над сваім лёсам і над асабістым месцам на Крыжовым шляху. Затым у араторыі пачаўся вечар.

Дэвізам мерапрыемства сталі словы: «Быць рознымі — гэта дар». Хлопцы і дзяўчаты, падзяліўшыся на дзве каманды, мелі магчымасць паказаць свае здольнасці ў кіраванні аўтамабілем, праявіць кемлівасць у адказе на цікавыя пытанні, памерацца сіламі і  даведацца, у каго лепшы апетыт.

Апошнім момантам праграмы стала сумесная вячэра, дзе ўсе разам сядзелі за адным сталом як адна дружная сям’я.