10 красавіка пачалася пілігрымка ў Рым навучэнцаў Вышэйшай духоўнай семінарыі ў Гродне. Семінарысты, выкладчыкі і некаторыя святары Гродзенскай дыяцэзіі накіраваліся ў Вечны горад з пілігрымкай падзякі за 25 гадоў існавання семінарыі.

Маршрут будзе пралягаць па тэрыторыі найбольш вядомых санктуарыяў у Польшчы, Аўстрыі і Італіі. Галоўная мэта пілігрымкі – не толькі задаволіць цікавасць, але ў першую чаргу дакрануцца да духоўнага багацця гэтых мясцін і атрымаць благаслаўленне Папы Францішка.

Пілігрымку ўзначаліў дапаможны біскуп Гродзенскай дыяцэзіі Юзаф Станеўскі, які шмат гадоў быў рэктарам семінарыі ў Гродне.

Наведваючы Італію, яе выключныя і важныя мясціны, пілігрымы будуць дзякаваць Богу за ўсіх людзей, хто на працягу 25 гадоў ствараў супольнасць семінарыі: выкладчыкаў, свецкіх супрацоўнікаў і навучэнцаў.

Падчас пілігрымкі семінарысты і выкладчыкі на чале з рэктарам кс. д-рам Раманам Рачко прымуць удзел у агульнай аўдыенцыі з Папам 15 красавіка. Таксама яны наведаюць усе найбуйнейшыя рымскія базылікі, месца, звязанае з асобай Айца Піо – Сан Джаванні Ратонда, месца, звязанае са св. Антоніем – Падую, і месца, звязанае са св. Францішкам – Асізі.

Пілігрымка завершыцца святой Імшой у санктуарыі Найсвяцейшай Панны Марыі ў Чэнстахове, дзе ў капліцы цудатворнага абраза семінарысты падзякуюць Маці Божай за апеку над іх навучальнай установай.

Семінарыйная супольнасць ужо здзейсніла пілігрымку ў Вечны горад у 2010 г. з нагоды 20-годдзя існавання семінарыі. Вяртаючыся назад, удзельнікі таксама спыніліся на Яснай Гары. У той час генеральны настаяцель паулінаў а. Ізідор Матушэўскі перадаў у дар семінарыі копію цудатворнага абраза Маці Божай Чэнстахоўскай.

Момант перадачы копіі абраза Маці Божай Чэнстахоўскай. Чэнстахова, 12 верасня 2010 г.

Кс. Юрый Марціновіч

Фота: Кшыштаф Швертак/ Прэс-служба Яснай Гары