2 мая ў межах ХХІІ Дзён моладзі Гродзенскай дыяцэзіі адбылася эўхарыстычная адарацыя, падчас якой вельмі шмат людзей прыступіла да сакрамэнту пакаяння. Адарацыя і сакрамэнт пакаяння падрыхтавалі маладых людзей да пасвячэння ў “Рух чыстых сэрцаў”.

Маладыя вернікі, якія прыступілі да сакрамэнту пакаяння, добра зразумелі дэвіз сёлетніх Дзён моладзі, бо сапраўды чалавек, які паяднаны з Богам, можа Яго ўбачыць.

Праз цырымонію пасвячэння ў “Рух чыстых сэрцаў” і складанне абяцання моладзь даверыла свае сэрцы Езусу, які аздараўляе і дае руку маладому чалавеку.

У “Рух чыстых сэрцаў” можа ўступіць кожны, хто імкнецца аддаць Хрысту сваё сэрца і вучыцца ў Яго любіць чыстай любоўю.

Уступаючы ў рух, моладзь Гродзенскай дыяцэзіі такім чынам прымала рашэнне ісці з Езусам праз усё жыццё. Арганізатары Дзён моладзі патлумачылі маладым людзям, што калі ў іх жыцці здараецца грэх, неабходна як мага хутчэй выправіць яго, прыступіўшы да сакрамэнту пакаяння, і толькі шчырае пакаянне дае магчымасць і сілы пачаць нанова шлях ачышчэння сумлення.

Падчас пасвячэння ў рух моладзь абяцала штодзённа маліцца, чытаць кожны дзень хаця б невялікі фрагмент са Святога Пісання, рэгулярна спавядацца і як мага часцей прымаць святую Камунію. Абяцалі таксама вучыцца кантраляваць сваю сексуальную цягу, а з гэтай мэтай устрымлівацца ад палавых зносінаў да сакрамэнту сужэнства, не купляць і не чытаць амаральных кніг і часопісаў, не глядзець парнаграфічных фільмаў.

“Пане, прашу Цябе, вучы мяне жыць і паступаць так, каб самым важным у маім жыцці была любоў. Святая Багародзіца, Маці мая, вядзі мяне да самай крыніцы Любові, да Пана Езуса, каб я заўсёды спадзяваўся толькі на Яго і верыў толькі Яму. Амэн”, - гэтымі словамі маладыя людзі завяршылі абяцанне.

Сваё рашэнне маладыя хрысціяне даверылі Маці Божай і атрымалі благаслаўленне.

Артур Капуста