3 мая прыхільнікі творчасці ксяндза Канстанціна Стаповіча, які пісаў пад псеўданімам Казімір Сваяк, сабраліся ў чарговы раз, каб аддаць пашану гэтаму выбітнаму сыну сваёй зямлі. Гэтым разам сустрэча з нагоды 89-й гадавіны смерці святара і паэта — ён адышоў у вечнасць 6 мая 1926 г. — адбылася ў Клюшчанах (Гродзенская дыяцэзія), яго роднай парафіі.
Тут, у клюшчанскім касцёле святога Яўхіма, будучы ксёндз Канстанцін Стаповіч быў ахрышчаны, тут 100 гадоў таму адслужыў сваю прыміцыйную Імшу. Менавіта тут прайшоў першы год святарскай службы ксяндза Стаповіча – у 1915-1916 гг., калі святар пачаў ужываць беларускую мову ў гаміліях, арганізаваў касцёльны хор, што спяваў як рэлігійныя, так і беларускія народныя песні і з якога потым паўстаў гурток беларускай моладзі «Хаўрус Сваякоў».
На пачатку сустрэчы ўсіх прысутных сардэчна прывітаў пробашч клюшчанскай парафіі ксёндз Анатоль Захарэўскі.
У гаміліі ксёндз Ежы Вільк SCJ, вікарый парафіі ў Паставах, прачытаў верш Казіміра Сваяка «Шчасце», які заканчваецца радком: «Усім для шчасця патрэба Бога». Святар звярнуў увагу на глыбокі змест гэтага вершу, а таксама падзяліўся ўспамінамі аб часах сваёй службы ў парафіі ў Дунілавічах. Разам з моладдзю ксёндз Ежы Вільк вывучаў тады творчасць Казіміра Сваяка, і калі яны паехалі ў камайскі касцёл, дзе ў свой час ён служыў, адзін з міністрантаў падчас экскурсіі расказаў гэты верш на памяць. ![](/2/images/phocagallery/2015/05/2015-05-06-svajak/thumbs/phoca_thumb_l_svajak-059.jpg)
Звяртаючыся да постаці ксяндза Стаповіча, ксёндз Ежы Вільк нагадаў, што святару, які жадаў, каб ягоны народ чуў Божае слова на беларускай мове, прыйшлося спазнаць пераслед за сваю рэлігійна-асветніцкую дзейнасць, аднак «ён верыў, што з Езусам можа шмат, вера – гэта такая сіла, якая дае шмат магчымасцяў чалавеку». Ксёндз Ежы Вільк нагадаў словы Папы на пенсіі Бэнэдыкта XVI, што чалавек, які верыць у Бога, не з’яўляецца самотным, а таксама нагадаў, што хаця ксёндз Стаповіч пражыў няшмат – усяго 36 гадоў, але паспеў за гэты час шмат зрабіць. «Усё добрае, што мы робім, застаецца пасля нас», — дадаў святар.
Пасля Імшы Іяланта Валуевіч, крэўная ксяндза Стаповіча, якая шмат робіць для захавання ягонай спадчыны, у сваім выступленні нагадала, што акрамя сённяшніх юбілеяў, звязаных з жыццём святара і паэта, у гэтым годзе спаўняецца 10 гадоў так званых «сваякоўскіх сустрэч». Таксама яна распавяла пра яшчэ адзін цікавы знак: падчас кожнай «сваякоўскай» сустрэчы ў клюшчанскі касцёл заўсёды залятае ластаўка. Іяланта Валуевіч узгадала тыя часы, калі клюшчанскі касцёл быў напоўнены людзьмі, і прыгадала імёны парафіян, якія ў свой час падзяліліся ўспамінамі сваіх бацькоў пра ксяндза Стаповіча – гэта Браніслава Масцяніца і Казімір Хадорскі. Тэрэза Суспіла, чыя маці ў свой час спявала ў хоры, арганізаваным святаром, у сваю чаргу наспявала песні гэтага хору. Усе яны ўжо адышлі ў вечнасць. «Вечны супакой і памяць гэтым людзям», – пажадала Іяланта Валуевіч.
Генавефа Дубіловіч з парафіі ў Камаях (Віцебская дыяцэзія) у сваю чаргу падкрэсліла, што як існуюць гарады-пабрацімы, так і парафіі ў Камаях і Клюшчанах можна смела назваць парафіямі-пабрацімамі, і пажадала, каб гэтыя «сваякоўскія» сустрэчы працягваліся і далей.
Ксёндз Юрый Іодзік, пробашч парафіі ў Цудзенішках (Гродзенская дыяцэзія), адзначыў, што гэтыя сустрэчы – «плён працы і жыцця ксяндза Стаповіча, сына сваей зямлі», «нагода падзякаваць Пану Богу за Ягонага вялікага слугу».
Падчас сустрэчы прыгадалі Аркадзя Нафрановіча з Камаяў, паэта і прыхільніка творчасці Казіміра Сваяка, які нядаўна адышоў у вечнасць. Генавефа Дубіловіч прачытала ягоны верш, прысвечаны Казіміру Сваяку.
Краязнаўца Іван Драўніцкі нагадаў аб часах, калі ён толькі пазнаёміўся з творчасцю святара і паэта ў далёкія 1950-я гг., распавёў, як затым вывучаў ягоную творчасць разам са сваімі вучнямі.
Сустрэчу ўпрыгожылі спевамі гурт «Балцкі субстрат» і Аляксандр Якіменка з Астраўца, якія выканалі песні на словы Казіміра Сваяка, а таксама на музыку ягонага брата Альбіна Стаповіча.
![](/2/images/phocagallery/2015/05/2015-05-06-svajak/thumbs/phoca_thumb_l_svajak-086.jpg)
Святкаванне працягнулася на малой радзіме паэта – у в. Барані, што знаходзіцца за 8 км ад клюшчанскага касцёла. Некалькі гадоў таму тут быў адчынены музей братоў Стаповічаў. Тут адбылася сустрэча з крэўнымі святара, якія адмыслова дзеля гэтага прыехалі з Вільні. Для мясцовых жыхароў была арганізавана літаратурна-музычыная імпрэза, падчас якой прайшла віктарына на веданне жыцця і творчасці ксяндза Канстанціна Стаповіча.
Наступная сустрэча прыхільнікаў творчасці ксяндза Стаповіча — Казіміра Сваяка — адбудзецца ў Засвіры, у парафіі, дзе святар правёў апошнія гады свайго жыцця. Кацярына Лаўрыненка
|